Нийслэлийн захуудад махны үнэ энэ сарын 11-ний байдлаар буурсан үзүүлэлт ажиглагджээ. Үндэсний статистикийн хорооны гаргасан судлагаанаас харахад өмнөх долоо хоногоосоо “Хүчит шонхор”, “Барс”, “Таван Эрдэнэ” захуудад үхрийн ястай мах кг тутамдаа 2 орчим хувиар буюу 200 төгрөгөөр буурч, 7600-8800 төгрөгөөр худалдаалагдаж байна. Харин үхрийн цул махны тухайд үнэд нь өөрчлөлт ороогүй бөгөөд  лхагва гарагийн байдлаар хүнсний захуудад кг нь 9000-11500 төгрөгийн үнэтэй байгаа аж.

Хонины ястай мах “Хүчит шонхор”, “Барс”, “Таван Эрдэнэ”, “Хархорин” захад дунджаар 1-6 орчим хувиар буюу 100-500 төгрөгөөр бууран, кг нь 6800-7800 төгрөгөөр борлуулагдаж байна. Тэгвэл хонины цул мах зөвхөн “Хүчит шонхор” зах дээр кг тутамдаа 1.4 хувиар буурч, 7200 төгрөгийн үнэтэй болжээ. Адуу болон ямааны махны үнийн хувьд Улаанбаатар хотын хүнсний гол нэрийн захуудад өмнөх долоо хоногоосоо өөрчлөлт ороогүй байна.

А.Энхжаргал