Энэ жил 470 мянган тонн улаан буудай ху­­рааж авахаар төлөвлөсөн. Тариаланчид улаанбуудайг тонн тутамд 400-450 мянган төгрөгөөр худалдах саналтай байгаа. Энэ нь хэт өндөр үнэ учраас гурил үйлдвэрлэгчид гурилын үнийг нэмэхэд хүрээд байгаа юм. Өнгөрсөн жил тариаланчдаас 280 мянган төгрөгөөр буудай худалдан авч 550 төгрөгт гурилын үнийг барьсан. Мөн үүний дээр ҮХААЯ Монголбанктай хамтарч “Үнэ тогтворжуулах дэд хөтөлбөр”-ийг хэрэгжүүлсэн. Үүний үр дүнд гурилын үнэ жилийн турш тогтвортой байж чадсаныг гурил үйлдвэрлэгчид хэлж байгаа юм. . Харин энэ жил хөтөлбөр цааш хэрэгжиж, улаанбуудайн үнийг тонн тутамд 320 мянган төгрөгөөр худалдаж авах саналтай байгаагаа өнөөдөр болсон ҮХАА-н сайдтай уулзах уулзалтаараа илэрхийллээ. Харин яамнаас хоёр талын саналыг харьцуулсны дүнд хариу өгөхөө мэдэгдээд байгаа юм.

. ҮХАА-н  сайд Х.Баттулга: Яам алтан дунджийг барина

.

-Энэ жил гурил үйлдвэрлэгчдэд дэмжлэг үзүүлэхээр бол хичнээн хэмжээний дэмжлэг үзүүлэх вэ? -Монголбанктай хамтраад яам гурилын үнийг барихын тулд 40 орчим тэрбум төгрөгийг гурил үйлдвэрлэгчдэд 3,8 хувийн хүүтэйгээр санхүүжилт болгон өгсөн. Энэ санхүүжилтийн үр дүнд гурилын үнэ тогтвортой байсан. Эргэн төлөлт графикийн дагуу явж байгаа. Энэ маягаар яваад байвал гурилын үнийг бариад байх боломжтой. Тариалагчид, гурил үйлдвэрлэгчдийн саналыг сонсоод ямар байдлаар гурилын үнийг тогтоох вэ гэдгийг хэлэлцээд дүн гарах юм. Улаанбуудай зуун хувь болсон. Гэхдээ дэмжлэгийн асуудалд зөв хандахгүй бол гурилын үнэ өсөх магадлалтай. Гурил үйлдвэрлэгч, ялангуяа гурилан бүтээгдэхүүн үйлдвэрлэгчид ОХУ-аас гурил авах сонирхолтой байгаа. Ийм тохиолдолд тариаланчидад үнэгүй баахан буудай хураагдах болно. Үйлдвэрлэл эрхлэгчид тариаланчидтай хамтардаг учраас эхлээд үнийг тогтоо гэсэн саналыг хэлээд байгаа.

.

-Яамнаас ямар бодлого барьж байна? Алтан дунджийг л барьж байгаа. Тариаланчид, гурил үйлдвэрлэгч, хэрэглэгч гээд аль алийг нь гомдоохгүй. Гурилын үнийг аль болох багаар л өсгөхийг бодно.

.

Гурил үйлдвэрлэгчдийн холбооны захирал С.Санжхүү: Нэг тонн улаанбуудайг 420 мянган төгрөгөөр авбал гурилын үнийг 620 төгрөгт барина . Улаанбуудайг үнийг тариаланчидтай тохирч чадсан уу? Одоо тохироогүй байна. Өнгөрсөн жил 280 мянган төгрөгөөр тонн тутмыг авсан. Дээр нь урамшуулалд 100 мянгыг өгөөд нийтдээ 380 мянга болсон. Гэхдээ чанараасаа хамаараад үнэ нь өөр өөр л дөө. Одоо тариаланчид 400-450 мянгаар улаанбуудайг өгөх саналтай байгаа. Энэ тохиолдолд гурилын үнэ ойролцоогоор хичнээн төгрөг болж нэмэгдэх бол? Гурилын үнэ шууд автоматаар өснө. Гурилын үйлдвэр ажилчдынхаа цалинг өгнө, татвараа төлнө, хэвийн ажиллагааг хангахын тулд үнэ зайлшгүй өснө. Гурил үйлдвэрлэгчдийн  тооцоогоор 320 мянгаар аваад дээр нь урамшууллын 100 мянгыг нэмээд 420 мянгаар улаанбуудайг авбал гурилын үнийг 620 төгрөгт барих бололцоотой. .

“Улаанбаатар гурил” компанийн гүйцэтгэх захирал Ц.Мягмаржав:Төрийн зохицуулалт зайлшгүй хэрэгтэй

.

Энэ жилийн улаанбуудайн чанар хэр байна вэ? Энэ жилийн буудай чийгтэй байгаа. 14 хувийн чийгтэй будааг 3-4 сар хадгалах боломжтой. Чийгтэй буудай өндөр эрсдэлтэй. Бактери үржих нөхцөл бүрддэг учраас чанар талаасаа ч муу. Өндөр чийгшилтэй буудайг хатаалгаар авах боломжтой. Хатаалга нь эргээд 15-20 мянган төгрөгийн нэмэгдэл орчихдог.

.

Танай үйлдвэрт гурил үйлдвэрлэхэд ямар асуудал байна вэ? Манай үйлдвэр ямар ч буудайгүй болоод зогсчихсон. Ургац хураалт тулчихсан, тариаланч үйлдвэрлэгчид өгч авалцдаг үе. Тэгэхэд үнэ тодорхой бус байгаа нь хүндрэлтэй байдалд оруулаад байгаа. Яамны зүгээс та нар тариаланчидтайгаа тохироод улаанбуудайгаа авчих гээд байгаа. Гэвч бид нар яамтай гурилынхаа үнийг барина гэдэг гэрээ байгуулсан учраас өндөр үнээр буудай авч чаддаггүй. Тэгэхээр засгийн зохицуулалт зайлшгүй хэрэгтэй.

.

Танай үйлдвэр гурилын үнийг хэдэд барих боломжтой байна? Буудай 320 мянга гэвэл манайх нэгдүгээр гурилын үнийг 620 төгрөгт барих боломжтой. Дээд гурил бол үнэтэй л дээ. Хоёрдугаар гурил одоо 300 төгрөгөөр зарагдаж байна. .

Ц.Зол