Монгол Улсын Ерөнхий сайд Н.Алтанхуяг “Бүтээн байгуулалтын цаг” ээлжит уулзалтаараа цаг үеийн ажлын явц болон Засгийн газрын нэг жилийн хугацаанд хийсэн ажилд үнэлэлт, дүгнэлт хийв. Өнгөрсөн хугацаанд нийтдээ 500 гаруй ажлыг эхлүүлжээ.

.

Орон сууцны үнэ буурна

Энэ удаагийн хуралдаанд БХБ-ын сайд Ц.Баярсайхан оролцож, барилгын салбарт хийж байгаа бүтээн байгуулалтын ажлын явцын талаар мэдээлэл хийсэн юм. Жилийн найман хувийн хүүтэй орон сууцны зээлийг иргэдэд олгож эхлээд  хоёр сар орчмын хугацаа өнгөрч байгаа. Зээлийн хүрээнд өмнө олгосон ипотекийн зээлээс 794.6 тэрбум төгрөгийн зээлийг дахин санхүүжүүлэх хүсэлт банкуудад иржээ. Үүнээс 16122 иргэний хүсэлтийг бүрэн шийдвэрлэж, орон сууцны ипотекийн 451.2 тэрбум төгрөгийн зээлийг дахин санхүүжүүлж, 8 хувьд шилжүүлээд байгаа аж. Иргэд 487.4 тэрбум төгрөгийн орон сууцны ипотекийн зээл шинээр авах хүсэлт гаргаснаас банкууд 8129 иргэнд 463.1 тэрбум төгрөгийн орон сууцны ипотекийн зээл шинээр олгохоор шийдвэрлэжээ. Урьдчилсан  тооцоогоор энэ онд 14000 айлын орон сууц шинээр ашиглалтад орох аж. Орон сууцнуудыг  гадаадын иргэд  худалдан авах,  ченжүүд ашиглалтад орж байгаа орон сууцыг олноор авч үнэ хөөрөгдөж байна гэх мэдээлэл иргэдээс ирсэн байна. Харин  Үл хөдлөх хөрөнгийн бүртгэлийн газраас мэдээллээр нийт орон сууцны 96 хувь нь Монгол Улсын иргэний нэр дээр бүртгэлтэй байгаа бол 2.6 хувь нь аж ахуйн нэгж дээр бүртгэлтэй байдаг байна. БХБ-ын сайд Ц.Баярсайхан:

-Засгийн газраас иргэдийг хямд үнэтэй орон сууцаар хангахын тулд зарим барилгын компанитай гэрээ байгуулан, дэд бүтцийг шийдсэн. Ингэснээр Нисэхэд хямд өртөгтэй орон сууц барих ажил хавар эхэлсэн. 100 айл, Баянзүрх дүүрэгт тус бүр орон сууцны хороолол баригдаж байгаа. Эдгээр орон сууцнууд ашиглалтад орж зах зээлд нийлүүлэгдэхээр орон сууцны үнэ буурна хэмээлээ. .

Цементийн хомсдол үүсэхгүй

Сүүлийн гурван өдөр цементний хомсдол үүссэн. Энэ хугацаанд цементийн үнэ өссөн аж. Нэг тонн цемент 200 мянга хүрсэн болохоос борлуулалт хийгдээгүй аж.  Өнөөдрөөс эхлээд энэ хомсдол үүсэхгүй гэнэ. Өссөн дүнгээр зарлагдсан болохоос бус худалдан авалт  явагдаагүй гэж БХБ-ын дэд сайд Б.Эрдэнэбүрэн мэдээлэв.  Замын-Үүдэд  270 вагон, цаана нь 100 вагон цемент хүлээгдэж байгаа юм байна.

.

“Бүтээн байгуулалтын цаг” хуралдааны төгсгөлд Ерөнхий сайд Н.Алтанхуяг:

-Шинэчлэлийн Засгийн газар гэр хорооллын 184 мянган айлын амьдралыг үндсээр нь өөрчлөх ажлыг манай нийслэлийнхэн эхлүүлээд явж байна. Энэ жил гэр хорооллын дахин төлөвлөлтийн хүрээнд  олон газар  шав тавьсан. Дараагийн жил шав тавьсан барилгууд дуусах байх. Барилгын чиглэлээр маш олон юм хийсэн. Барилгын үйлдвэрлэлийг дэмжлээ. 1700 гаруй км зам ашиглалтад орох гэж байна. Өмнөх жилүүдэд дөрвөн жилд л 1000 гаруй км зам тавьдаг байсан юм билээ. Ингээд ийм их ажил хийчихлээ гэхээр чанаргүй зүйл хийлээ гэнэ дээ. Замын асуудал дээр чанарын шаардлага тавьж байгаа. Тавантолгойгоос Гашуунсухайт руу төмөр зам тавих ажил 40 хувьтай явж байна. Оюутолгой гүний уурхайгаасаа хамаарахгүйгээр экспортод баяжмалаа гаргаж эхэлсэн. Энэ жил гэхэд 300 мянган тонн баяжмал экспортод гаргана. “Гудамж” төсөл, “Амгалан” ДЦС барих  ажлууд эхлээд явж байна. Тавантолгойн, III  IV  цахилгаан станцын өргөтгөл гээд эрчим хүчний салбарт олон ажлыг амжилттай эхлүүлж чадсан хэмээн салбар салбараар нь онцлон сайшаав.   Шинэчлэлийн Засгийн газар өнгөрсөн хугацаанд 70 удаа хуралдаж 1232 асуудлыг шийдвэрлэсэн байна. Энэ нь соц-ийн хэллэгээр хоёр жилд хуралдах ажлаа нэг жилд багтаан хийсэн. Төлөвлөгөөт таван жилийн гавшгайч шиг ажилласан хэмээн  дүгнэсэн юм.

.

Н.Энхлэн