Өнөөдөр ЦЕГ-аас мэдээлэл хийж, УИХ-ын гишүүн Н.Номтойбаярт эрүүгийн хэрэг үүсгэснийг баталсан. Тэгвэл Н.Номтойбаяр гишүүний өмгөөлөгч Н.Мандах дөнгөж сая мэдээлэл хийлээ. Энэ үеэр тэрбээр “Н.Номтойбаяр гишүүнд эрүүгийн хэрэг үүсгэж, шалгаагүй” гэдгийг онцолсон юм. Түүнтэй Н.Номтойбаяр гишүүнтэй холбогдох асуудлаар ярилцлаа.

-УИХ-ын гишүүн Н.Номтойбаярт эрүүгийн хэрэг үүсгэсэн, мөн мэдүүлгээ өгөхгүй байгаа талаар ЦЕГ мэдэгдсэн. Яагаад одоог хүртэл мэдүүлэг өгөөгүй байгаа вэ?

-Өнөөдрийн байдлаар хуулийн байгууллагаас Н.Номтойбаярт эрүүгийн хэрэг үүсгэсэн, болон байцаалт өгөхөөр дуудсан бичиг албан ёсоор  цагдаагийн байгууллагаас ирээгүй. Тийм учраас би өнөөдөр эрүүгийн хэрэг үүсгэсэн гэх асуудал дээр эсрэг байр суурьтай байна. Хууль хяналтын байгууллагаас энэ хэргийг шалгах ёстой.

-УИХ-ын гишүүн учраас байцаалт авах эрхзүйн орчин нь үүсээгүй гэсэн үг үү?

-УИХ-ын гишүүний хувьд арай өөр субъек гэдгийг та бүхэн мэдэж байгаа байх. Үүний тухай хэвлэл мэдээллээр яриад байх шаардлага, боломж байхгүй. Үүнийг хуулийн байгууллагаас асуусан дээр байх.

- Н.Номтойбаяр гишүүн үнэхээр тэрбээр хүн хутгалсан юм уу?

-Н.Номтойбаяр гишүүн хүн хутгалаагүй. Хэн нэгэн цагдаагийн байгууллагад гомдол гаргаад, түүний дагуу цагдаагийн байгууллага шалгаж байсан бол би энд мэдээлэл өгөөд суухгүй байлаа. Өчигдөр хэд хэдэн мэдээллийн хэрэгслээр янз бүрийн мэдээлэл цацагдсан. Үүнийг бид судлаж байна.

-Тухайн өдөр яг юу болсныг та мэдэж байгаа юу?

-Гишүүн өчигдөр өдрийн сонин болоод хэвлэл мэдээллийн хэрэгсэлд товч ярилцлага өгсөн байгаа. Тэр ярилцлага дээр тухайн орой бусдыг хутгалсан гэх үйл явдал болоогүй гэж хэлсэн. Үүнээс илүү яг юу болсныг би хэлэх боломжгүй. Мэдээж үүнийг хууль хяналтынхан шалгаж байгаа бол үнэн зөвийг тогтоох байх.

-Тэгвэл яагаад Сүхбаатар дүүргийн цагдаагийн хэлтэст эрүүгийн хэрэг үүсгэсэн юм бэ. Эсвэл өөр асуудлаар шалгагдаж байгаа юм уу?

-Сүхбаатар дүүргийн цагдаагийн 1-р хэлтэстээс Н.Номтойбаяр гишүүнд эрүүгийн хэрэг үүсгэж, шалгаагүй гэдгийг албан ёсоор мэдэгдсэн.

-ЦЕГ-аас мэдээллэхдээ Сүхбаатар дүүргийн цагдаагийн 2-р хэлтэст шалгаж байгаа гэсэн шүү дээ?

-Яагаад 1-р хэлтэс, 2-р хэлтсийн асуудал яригдаж байгааг гайхаж байна. Хэрэв хүн хутгалсан асуудал гарсан бол харъяалалынхаа дагуу 1-р хэлтэст шалгагдаж байгаа байх гэж бодож байна. Хэргийн гол мэдээллийн Сүхбаатар дүүргийн цагдаагийн нэгдүгээр хэлтсийн эрх бүхий албан тушаалтнууд өгөх байх гэж үзэж байна.

-Тэгэхээр ЦЕГ-аас ор үндэслэлгүй мэдээлэл өгсөн гэсэн үг үү. Энэ хэрэг гарах үед цагдаагийн албан хаагчид өөрсдөө очсон гэсэн?

-Эрүүгийн хэрэг үүсгэсэн бол тогтоол гарах ёстой. Уг тогтоолын дагуу цагдаагийхан Н.Номтойбаяр гишүүнд танилцуулсан бол би нуух шаардлага байхгүй. Энэ асуудлыг Сүхбаатар дүүргийн цагдаагийн 1-р хэлтсийн албан тушаалтнуудаас тодруулаач гэж хүсье. Өнөөдөр ЦЕГ-аас мэдээлэл өгсөнтэй холбогдуулж би мэдээлэл өгч байна. Тэд ор үндэслэлгүй мэдээлэл хийсэн байна. Хэргийн гол мэдээллийн Сүхбаатар дүүргийн цагдаагийн нэгдүгээр хэлтсийн эрх бүхий албан тушаалтнууд өгөх байх гэж үзэж байна.

-ЦЕГ-аас үнэхээр ор үндэслэлгүй мэдээлэл хийсэн бол эрхэм гишүүн нэр төрөө сэргээлгэх үүднээс өнөөдөр өөрөө хэвлэлийн хуралдаа оролцох ёстой байсан гэж бодож байна?

-Өөрөө хэвлэлд мэдээлэл өгөх байх. Гэхдээ хэзээ мэдээлэл өгөх вэ гэдгээ гишүүн өөрөө шийднэ.

-Тухайн үед Н.Номтойбаяр гишүүн тайлбар өгөхдөө Нямдорж гэх этгээд хутга барьж орж ирсэн. Хохирогч нь “Шинэ дэлхий” телевизийн захирал Э.Энх-Эрдэнэ гэж мэдэгдээд байгаа?

-Тэр хүмүүсийг барьчихсан байхыг үгүйсгэхгүй. Яг энэ асуудлаар цагдаагийн байгууллага дээр тухайн хохирсон гээд байгаа иргэд болоод гэмт хэрэгт холбогдсон улсыг хэрвээ шалгаж байгаа бол энэ мөрдөн байцаалтын нууцтай холбоотой асуудал.

-Эрүүгийн хэрэг үүсгэлээ гэсэн албан бичгийг цагдаагийн байгууллагаас ирвэл очиж мэдүүлэг өгөх үү?

-Мэдээж баримт бичиг албан ёсоор ирвэл хуульд заасныхаа дагуу оролцоод л явна.

-Та Н.Номтойбаярын өмгөөлөгчөөр хэр удаан хугацаанд ажиллаж байгаа вэ?

-Би 2-3 жил Н.Номтойбаярын өмгөөлөгчөөр ажиллаж байна.

Б.Цэрэндэжид

Гэрэл зургийг Б.Мөнх-Эрдэнэ