Татварын багц хуулийн өөрчлөлт, шинэчлэлийн талаар Сангийн яамнаас өнөөдөр олон нийтэд мэдээллээ. Татварын хоёр дахь шатны шинэчлэлд хууль тогтоомжийг боловсронгуй болгох, хөрөнгө оруулалт хөдөлмөр эрхлэлтийг дэмжих, далд эдийн засгийг бууруулах, татварын албаны үйлчилгээг цахимжуулах чиглэлээр хэрэгжүүлэхээр болжээ. Сангийн дэд сайд С.Пүрэв “Эдийн засаг, хөрөнгө оруулалтын орчныг сайжруулах үүднээс хийж буй татварын шинэчлэлээр татвар нэмэхгүй, аж ахуйн нэгжид татварын дарамт үзүүлэхгүй” гэв.   Түүний хэлж буйгаар Татварын хууль тогтоомжийг энгийн ойлгомжтой болгохын зэрэгцээ татварын хөнгөлөлт чөлөөлөлтийг нэгдсэн байдлаар тогтоох аж. Өнөөдөр татварын 16 хууль дотор 24 нэр төрлийн татвар ногддог байна. Үүнийг шинэчилж 13 хуулиар зохицуулахаар болжээ. Түүнчлэн хөрөнгө оруулалтыг гадаад, дотоод гэж ялгахгүй бөгөөд инновацийг дэмжих аж. Мөн шинээр бизнес эрхлэгчдийн орлогын албан татварыг 1-1.5 жил төлөхгүй байх, жилийн 1.5 тэрбум төгрөгөөс доош борлуулалтын орлоготой аж ахуй нэгжүүдийг төлсөн татварын 90 хувийг буцаан олгох, татварын алдагдал шилжүүлэх уртасгах зэрэг арга хэмжээг авах юм байна.   Дашрамд дурдахад 24 нэр төрлийн албан татвар дотроос Бэлэглэлийн, Нийслэл хотын, Нохойны албан татварууд огт хэрэгжээгүй ирсэн. Иймээс шинэчилсэн Татварын тухай хуульд Нохойны албан татварыг цаашид Монголд хэрэгжих нөхцөл үүсээгүй гэж үзээд хүчингүй болгожээ. Харин үүний оронд дээрх хэрэгжээгүй хоёр татвар дээр Газрын хэвлий ашигласны албан татварыг нэмж оруулсан байна. А.Энхжаргал