Улаанбаатар хотын агаарын бохирдлын хэмжээг бууруулах чиглэлээр Мянганы сорилтын сангийн “Цэвэр агаар” төслийн хүрээнд өчигдөр Баянзүрх дүүргийн орлого багатай 49 иргэнд утаагүй зуух бэлэглэжээ. Төсөлд тус дүүргийн 2, 4, 5, 19, 21, 22, 27 дугаар хороодын 16078 айл хамрагдаж байгаа юм. Гэхдээ хязгаарлалтын бүсэд амьдарч байгаа боловч орлого багатай өрхүүд төслийн зуухнаас худалдаж авах боломж хомс тул дүүргийн Засаг дарга Б.Батзоригийн санаачилснаар амьжиргааны төвшингөөс доогуур орлоготой, эмзэг бүлгийн 49 өрхөд эрчим хүчний хэмнэлттэй, утаагүй зуухыг гардуулан өгчээ.