Ховор амьтныг тусгай төлбөртэйгээр олзворын болон спорт чиглэлээр агнах, барих тусгай зөвшөөрөл олгох үйлчилгээг манай улсад 1962 оноос эхлэн өнөөдрийг хүртэл улсын төсвийг бүрдүүлэх зорилгоор агнуулж, бариулж ирсэн. 2009-2011 онд 160 толгой угалз,  520 толгой тэх, 20 толгой хар сүүлтий, 140 толгой бор гөрөөс, 330 толгой цагаан зээр, 260 толгой чоныг гадаадын анчдаар агнуулж, дотоодын ахуйн хэрэгцээнд 920 толгой бор гөрөөс, 865 толгой зэрлэг гахай, 4950 толгой цагаан зээр,  400 толгой заарт харх, 200 толгой үнэг, хярс, 3100 хөтүү, ятуу, 2000 хур сойр тус тус агнуулж, 646 толгой идлэг шонхор экспортолжээ.

Мөн хугацаанд үйлдвэрлэлийн зориулалтаар олборлох загасны хэмжээг 260 тн-оор тогтоож, 250 орчим тонн загасыг олборлосон байна. Агнуурын нөөц ашигласны төлбөр, ан амьтан агнах, барих зөвшөөрлийн хураамжийн орлогоос 2009-2011 онд нийт 11,4 тэрбум орчим төгрөгийг улс, орон нутгийн төсөвт оруулжээ.

Харин 2012 оны гүйцэтгэлээр нийт 50 угалз, 102 тэх, 3 халиун буга, 44 цагаан зээр, 13  бор гөрөөс, 7 саарал чоно, 150 идлэг шонхор, 545 толгой агнуурын шувууг гадаадын анчдад зуучлан агнуулж, спорт загасчлал хийх 260 гадаадын загасчныг хүлээн авч ангийн төлбөр, хураамжийн орлогоос 3,5 тэрбум төгрөг улсын төсөвт төвлөрсөн байна.

Ц.Зол