Италийн парламент ерөнхий сайд Энрико Леттагийн засгийн газарт итгэл үзүүлсэнээр Силвио Берлускони жигүүрээ алдлаа. Засгийн газарт итгэл үзүүлэх эсэх тухай асуудлыг түүний улс төрийн өрсөлдөгч Силвио Берлускони санаачлан хэлэлцүүлсэн боловч Берлусконигийн холбоотнууд ерөнхий сайдыг дэмжсэн нь нэлээдгүй шуугианыг тариад байгаа юм. Италийн парламентын санал хураалт 20 жилийн турш Италийн улс төрд заларсан Силвио Берлусконигийн төгсгөл гэж “ВВС” агентлаг бичиж байна.

Силвио Берлускони засгийн газарт итгэл хүлээлгэх эсэх тухай асуудлыг өөрөө санаачлан парламентад өргөн барьсан боловч санал хураалт эхлэхээс өмнөхөн улс төрийн холбоотнууд ч түүнээс зайгаа барьсан учраас Леттагийн Засгийн газрыг дэмжихээс аргагүй болжээ. Тэрбээр “Манай нам засгийн газрыг дэмжих шийдвэр гаргасан. Намын дотор хагарал үүссэн гэж бодохгүй байна” гэв. Ерөнхий сайд Энрико Летта татварын хувь хэмжээг бууруулах амлалт өгсөн учраас дэмжих шийдвэр гаргасан гэж Берлускони хэлжээ. Санал хураалтын үр дүнд парламентын 235 гишүүн засгийн газрыг дэмжиж, 70 гишүүн эсрэг санал өгсөнөөр Силвио Берлускони жигүүрээ нэг мөсөн алдлаа.

Б.Дэлгэрцэцэг