Бээжин хотноо өнгөрсөн сарын 18-нд гарын үсэг зурсан Цэрэг-техникийн хамтын ажиллагааны тухай Монгол, Хятад хоёр улсын Засгийн газар хоорондын хэлэлцээрийг Засгийн газрын хуралдаанаар баталлаа.

Өнгөрсөн сарын сүүлчээр Батлан хамгаалахын сайд Д.Бат-Эрдэнийн БНХАУ-д хийсэн албан ёсны айлчлалын үеэр энэ хэлэлцээрт талууд гарын үсэг зурсан юм. Хэлэлцээр байгуулснаар Монгол, Хятадын стратегийн түншлэлийн харилцааны хүрээнд батлан хамгаалах салбарын харилцааны түвшинг шинэ шатанд гарган, бүх төрлийн цэргийн техник хэрэгсэл, технологийн чиглэлээр туршлага солилцох, цэргийн зориулалттай зарим төрлийн бүтээгдэхүүн авах, инженер техникийн нарийн мэргэжлийн боловсон хүчин бэлтгэх, цэргийн аж үйлдвэрийн салбарт хамтын ажиллагааг нээн хөгжүүлэх эрх зүйн орчин бүрдэх юм.