Ингэж хэлэхээр Т.Батаар гэгч амьд амьтан эсвэл хүн болчихож магад. Уг нь яс л юм шүү дээ. Энэ ясыг авчрахдаа ямар хэмжээний зардал гаргасан талаараа Ц.Оюунгэрэл сайд өнөөдрийг хүртэл ам нээсэнгүй. Гурван удаагийн шүүх хурал, өмгөөллийн зардалд маний тодорхойлолтоор бол багагүй ногоон зарлагадсан. Дээр нь манай талд ажилласан хүмүүст талархсан дайллага цайллага АНУ-д болсон. Мэдээж Т.Батаар түүний нөхдийг авчрахаар очсон Ц.Оюунгэрэл тэргүүтэй албаныхан үнэтэй буудалд тухалсан. Бас ШУА, нийслэлийн Цагдаагийн газар, нийслэлийн Аялал жуулчлалын газар, “Үндэсний газарзүй Монгол” сэтгүүл, “Тэнгэрлэг үсэг” ХХК зэрэг байгууллага, хамт олныг Т.Батаарын хүндэт өргөмжлөлөөр шагнасан. Өргөмжлөл нь уйгаржин монгол бичиг, кирилл үсэг, англи хэлээр бичигдсэн гээд багагүй зардлаар бүтсэн эд харагдсан. Энэ мэтээр Т.Батаарыг авчрах замд багагүй зардал гарсан нь мэдээж. Гэхдээ хэд гэдгийг нь Ц.Оюунгэрэл сайд л мэднэ. Азаар Т.Батаарын тээвэрлэлтийг “Кореан эйр” компанийнхан үнэ төлбөргүй хийж, орон байрыг “М Ойл”-ынхон ивээн тэтгэсэн. Тэгээгүй бол бас л төсвийн хөрөнгө. Т.Батаар төв талбайд залраад 120 сая төгрөгийн орлого олсон гэнэ лээ. Зардлаа нөхсөн эсэхийг бид мөн л мэдэхгүй, сайд л мэднэ.

.

Андуурсан нэмэгдэл

АНУ-аас Т.Батаар ирж, манайхан төв талбайдаа хөл хөөр болж байсныг та бүхэн  санаж байгаа байх. Ерөнхийлөгчийн Тамгын газрын дарга П.Цагаан ясыг эх нутгаа санаж мөрөөдөн, санагалзан ирсэн хэмээн дэвэргэж, ССАЖ-ын сайд Ц.Оюунгэрэл Т.Батаарын тухай үлгэр зохион ярьж ёстой л хөөрцөглөнө гэгч болсон. Монгол Улсыг гийгүүлэх ховор эрдэнэ мэтээр пиардсанаар бол манайх аялал жуулчлалын салбараас цөм хийх байлаа. Гэтэл их санасан газар ес хоног хоосон гэгчээр Т.Батаар ирсэн жилийн жуулчдын тоо нэмэгдэх нь битгий хэл бүр буурчихаж. Ц.Оюунгэрэл сайдын тооцоолсноор бол энэ зун жуулчдын тоо хэдэн зуугаараа нэмэгдэж, Монголын Т.Батаартай аялал жуулчлал цэцэглэх байлаа. Харамсалтай нь энэ жил ирсэн жуулчдын тоог өнгөрсөн онтой харьцуулахад 15.1 хувиар буурсан үзүүлэлт гарсныг Вloomberg телевиз дамжуулав. Гэтэл ССАЖЯ түүний харьяа Аялал жуулчлалын газрын даргын хэлж буйгаар бол жуулчдын тоо нэмэгджээ.

.

Нэмэгдсэн гэдгээ “Жуулчдын тоо өссөнийг орон нутгийн болон улсын чанартай үзвэрийн газруудын зарагдаж байгаа билетийн тооноос бид харж чадаж байна”  хэмээн тайлбарлав. Гэтэл сүүлийн үед нэмэгдсэн жуулчдын тоонд нэг “но” илэрсэн гэж дуулдах боллоо. Жуулчдын тоо нэмэгдсэн гээд залж яваа салбарын яамныхан манайд ажиллахаар ирсэн хятадуудыг жуулчид гээд бүртгэчихсэн мэдээ чих дэлсэв. Өөрөөр хэлбэл, манай улсын зам барилгын салбарт ажиллахаар гурван сарын визтэй ирсэн хятад иргэдийг жуулчин гэж бүртгээд нүүрээ тахалчихсан гэсэн үг. Энэ оны эхний хагаст Монголд ирсэн гадаадын 217.3 мянган иргэнийг  улс орноор нь ангилбал дийлэнх буюу 55.2 хувийг урд хөршийн иргэн эзэлж байгаа юм. Жуулчин гээд бүртгэчих өндөр магадлалтай гэсэн үг. Хэн нь жуулчин, хэн нь гэрээт ажилтан гэдгийг мэдэхгүй хүмүүс салбарыг удирддаггүй л баймаар. Тэгэхээр яамны сайд Ц.Оюунгэрэл, Аялал жуулчлалын газрын дарга Б.Маргад нар биднийг хуурсан гэдэг нь илүү үнэнд ойртох нь бололтой.

.

В.Хэрлэн