АНУ-ын Төрийн нарийн бичгийн дарга Жон Керригийн санаачилсан “Үл довтлох гэрээ”-нд Пхеньян гарын үсэг зурахаас татгалзсан тухай “CNN” агентлаг мэдээллээ. Хойд Солонгосыг цөмийн зэвсэггүй бүс нутаг болгох болзолтой байсан гэрээнээс тус улс татгалзсанаас болж, хоёр улсын харилцаа дахин хурцадмал байдалд орлоо гэж НҮБ-ын Аюулгүй зөвлөл үзэв. Энэхүү гэрээг Хойд Солонгосын тал үзэглэсэн тохиолдолд л НҮБ болон АНУ хүнсний тусламж илгээх төлөвлөгөөтэй байжээ. Пхеньян гурав дахь удаагаа цөмийн туршилт явуулсны дараа НҮБ-ын Аюулгүйн зөвлөл хориг арга хэмжээ авах шийдвэр гаргасан юм.

Өнгөрсөн жилээс хойш санал болгосон тус гэрээг Ким Чен Ун “БНАСАУ-ын ирээдүйд аюул учруулах магадлалтай” гэж татгалзсан гэнэ. Түүний энэ шийдвэр нь Японы тэнгист АНУ, Өмнөд Солонгос, Япон улсын хамтарсан цэргийн сургуулилт хийсний улмаас Хойд Солонгос дайны бэлэн байдалд шилжээд буй нь нөлөөллөсөн байх магадлалтай гэж АНУ-ын тал үзсэн байна.

Б.Дэлгэрцэцэг