Жижиг, дунд үйлдвэрлэл эрхлэгчдийг дэмжих зорилгоор төрөөс Жижиг, дунд үйлдвэрийг хөгжүүлэх сангаар дамжуулан тав хүртэлх жилийн хугацаатай, жилийн долоон хувийн хүүтэй хөнгөлөлттэй зээл олгодог. ЖДҮ-ийг хөгжүүлэх сангаас 5549 аж ахуйн  нэгж байгууллага, иргэдийн төслийг шалгаруулж  нийт 489,9 тэрбум төгрөгийн зээлийн дэмжлэг үзүүлсэн байна. Энэ зээлийн үр дүнд 26,492 үндсэн ажлын байр нэмэгдэж, 17365 ажлын байр хадгалагдаж үлджээ. Хөдөлмөрийн яамны Төрийн нарийн бичгийн дарга н.Гантулга, ЖДҮ-ийг хөгжүүлэх сангийн захирал н.Баттүвшин, ЖДҮ-ийг хөгжүүлэх газрын дарга Б.Бат-Амгалан нар  сангийн үйл ажиллагааны талаар мэдээлэл хийсэн юм. ЖДҮ-ийг хөгжүүлэх сан нь зээлийн батлан даалтын сан, тоног төхөөрөмжийн лизингийн үйлчилгээ, төрөөс олгож байгаа  хөнгөлөлттэй зээл гэсэн гурван чиглэлээр үйл ажиллагаа явуулдаг байна.

6

Хөдөлмөрийн яамны Төрийн нарийн бичгийн дарга н.Гантулга:

- Төрөөс олгож байгаа хөнгөлөлттэй зээлийг ЖДҮ эрхлэгчид их сонирхдог. Үүнтэй холбоотой санал гомдол манай яаманд их ирдэг. Энэ сангийн ажиллагаа нийтэд ил тод биш байна. Төсөл хүлээн авах хугацаа тодорхойгүй гэх мэт гомдол ирдэг байна. Уг гомдлын мөрөөр эхний ээлжинд сангийн ажлаа ил тод болгохоор ажиллаж байна.  Энэ жил Хөгжлийн банкнаас 50 тэрбум төгрөгийг ЖДҮ-ийн сан авсан. Үүнээс одоо 11 тэрбум төгрөг үлдсэн. Энэ 11 тэрбум төгрөг дээр төсөл сонгон шалгаруулалтыг зарлаж байна. 2013 оны 10 дугаар сарын 11-нээс 11 дүгээр сарын нэгэн хүртэл буюу ажлын 10 хоногт багтаан төслүүдээ  ЖДҮ-ийг дэмжих сан дээр хүлээж авна. Төсөл сонгон шалгаруулах комиссын хуралдаан 11 дүгээр сарын 11-нд болно. Энэ хугацаанд төслөө багтааж ирүүлэхийг аж ахуйн нэгж, бизнес эрхлэгчдэдээ ил тод зарлаж байгаа гэсэн юм.

6

Комисс хуралдаад ямар төслүүдийг  сонгон санхүүжилүүлэхээр болсноо яамны сайтад тавих юм байна.

Н.Энх