Сэлэнгэ аймгийн Цагдаагийн газрын Эрүүгийн тасгийн дарга, дэд хурандаа П.Өлзийсайханд холбогдох хэргийн шүүх хурал өнөөдөр 11.00 цагт Чингэлтэй дүүргийн шүүхэд болно. Түүнийг бусдад авлига өгч албан тушаал дэвшсэн, олон удаагийн давтан үйлдлээр албаны эрх мэдлээ хэтрүүлэн ашиглаж, бусдыг айлган сүрдүүлж, эрүү шүүлт тулган, бусдыг зодож дарамтласан хэрэгт буруутгаад байгаа.

Харин түүний өмгөөлөгчийн хэлснээр бол  П.Өлзийсайханд Эрүүгийн хуулийн тусгай ангийн 230.3-т зааснаар хэрэг үүсгэн шалгаж байгаа. Тодруулбал, П.Өлзийсайхан долоон жилийн өмнө Замын цагдаагийн тасгийн байцаагч Н.Мөнгөнтулгад шаардлага тавьж маргалдсан байдаг. Улмаар нэг алгадсан. Гэхдээ Н.Мөнгөнтулгын биед гэмтэл учраагүй. Тэрбээр өөрөө ч П.Өлзийсайхан даргад ямар ч гомдолгүй. Миний биед ямарч гэмтэл учраагүйгээ хавтаст хэрэгт мэдүүлсэн. Гэтэл прокурорын газраас хэргийг долоон жилийн дараа сөхөж, хүнд гэмтэл гэдэг дүгнэлт гаргуулж хэрэг үүсгэсэн хэмээн өмнө нь хэвлэлийн хурлын үеэр мэдэгдэж байсан билээ. П.Өлзийсайхан нь одоогоор ШШГЕГ-ын харьяа Цагдан хорих 461 дүгээр ангид саатуулагдаад байгаа юм.