Эрчим хүчний яамны Стратегийн бодлого, төлөвлөлтийн газраас “Аймаг, сумын дулаан хангамжийн одоогийн байдал, шинэчлэн сайжруулах санал” хэлэлцүүлгийг зохион байгуулжээ. Тус хэлэлцүүлэгт салбарын эрдэмтэн судлаачид, инженер техникийн ажилтнууд, төрийн бус байгууллага, аж ахуйн нэгжийн 40 орчим төлөөлөл оролцож аймаг, орон нутгийн дулаан хангамжийн талаар саналаа солилцсон байна.

 Энэ үеэр оролцогсод халаалтын системийн технологийн шийдлийн талаар ялангуяа зуухнуудын сонголтыг нүүрсний чанарт тохируулан зөв сонгох, эрчим хүчний хэмнэлттэй, үр ашигтай тоног төхөөрөмжүүдийг нутагшуулах, ажиллуулах мэргэжилтэй боловсон хүчнийг бэлтгэх шаардлагатай зэрэг орон нутгийн дулаан хангамжийн системийг сайжруулах талаар олон санал дэвшүүлж, алдаа оноог нь үнэлж цэгнэжээ. Мөн сумдын дулаан хангамжийн системийг сумын төвийн барилга байгууламжийн нягтралаас хамааруулан төвлөрсөн байдлаар болон бие даасан системүүдийг сонгох, халаалтын зуухнаас гадна хэрэглэгчийн халаах хэрэгслүүдийн шинэчлэлтийг давхар тооцож байх, инженерийн байгууламжийн зураг төсөл, экспертизийн чанарыг сайжруулахад онцгой анхаарах хэрэгтэй зэрэг олон асуудлаар хэлэлцжээ.

Стратегийн бодлого, төлөвлөлтийн газраас салбарын аль нэг сэдвээр эрдэмтэн судлаачид, мэргэжилтнүүдийг оролцуулан хэлэлцүүлэг зохион байгуулахаар төлөвлөөд ажиллаж байгаагийн нэг нь дээрх хэлэлцүүлэг юм байна.

А.Жаргал