Төсвийн байнгын хороо хуралдаж байна. Өнөөдөр үдээс өмнө товлогдсон Төсвийн байнгын хорооны хуралдаан хойшилсоор, төрийн албан хаагчдын ажлын цаг дуусгавар болох үеэр буюу 17 цагт эхлэв. Төсвийн байнгын хорооны хуралдаанаар 2013 оны төсвийн тодотголын хоёр дахь хэлэлцүүлгийг хийх төлөвлөгөөтэй байлаа. Товлосон хугацаанаасаа зургаан цаг хойшилж эхэлсэн тус байнгын хорооны хуралдаанаар МАН, АН-ын ажлын хэсгүүд ойлголцолд хүрээгүйгээс үүдсэн хэрүүл болон хувирав.

1

Энэ онд хөрөнгө оруулалт хийхээр тусгагдсан ажлуудаас төсвийн тодотголоор 256 объектыг хасч байгаа юм байна. УИХ дахь МАН-ын бүлгийнхэн энэ объектуудыг  ирэх оны төсөвт тусгаагүй,  тиймээс хэзээ баригдах нь тодорхойгүй, дээр нь үүнээс үүдсэн 200 тэрбум төгрөгийг хэрхэх зэрэгт АН-ын бүлгийнхэнтэй ойлголцолд хүрээгүй аж. Тиймээс ажлын хэсгүүд нэгдсэн ойлголцолд хүрээгүй байхад тус байнгын хорооны хуралдааныг хийх боломжгүй гэсэн саналыг гишүүн Ч.Хүрэлбаатар тавьснаас үүдэн гишүүд маргалдаж, арай л барилцаж авсангүй.

1

Гишүүн Ч.Хүрэлбаатар “Хоёр намын ажлын хэсгүүд ойлголцолд хүрсэн асуудал дээр АН-ын бүлэг хүлээж авахгүй байна. Тэр дундаа АН-ын бүлгийн дарга манай намын ажлын хэсгийн саналыг үл хүндэтгэх, олонхиороо шийдээд явна гэж  түрэмгийлж байна” хэмээсэн юм.

1

Үүний хариуд АН-ын бүлгийн дарга Д.Эрдэнэбат: -Бид энэ оны төсвийн тодотгол дээр цаг хугацаа алдах гээд байна. Та нарын саналыг бид хүлээж авсан.  Маргаантай асуудлыг тогтоолоор хэлэлцээд явъя гэхээр та бүхэн бидэнд итгэхгүй байна гэсэн. Гарч байгаа зарчмын зөрүүтэй санал бол 2014 оны төсөвтэй холбоотой. Тиймээс хэлэлцэх асуудлынхаа сүүлд нь оруулчихъя.

1

МАН-ын бүлгийн ажлын хэсгийн ахлагч, УИХ-ын гишүүн Д.Оюунхорол: -Засгийн газар хариуцлагагүй ажилласнаас болж бид маргалдаж сууна. Хөрөнгө оруулалтаа их хэмжээгээр тасалдуулчихаад, тодорхой хэмжээний орлого орсон байхад ажил хийгээгүй Засгийн газарт төсвийн тодотгол хийж өгч болох уу. 2013 оны төсвийн тодотголоос хасагдсан объектуудыг 2014 оны төсөв дээр оруулаад, үнийн дүнг нь тэглээд явъя гэж байгаа. Бид 265 объектуудын тухай ярих гээгүй. Хөрөнгө оруулалт нь хийгдсэн объектуудын ажлыг үргэлжлүүлье гэж байна. Энэ асуудлаа шийдэж чадахгүй байгаа учраас бүлэг дээр дахин ярилцъя гэсэн юм. Тийм учраас нэхэл хатуутай байна. Төсвийн хөрөнгө оруулалтыг жигдлэх хэрэгтэй.

1

“Шударга ёс” эвслийн бүлгийн ахлагч Н.Батцэрэг: -Би Төсвийн байнгын хорооны гишүүн биш. Гэхдээ энэ байнгын хорооны хуралдаан дээр бүлгийн байр сууриа хэлэх гэж орж ирсэн юм. Гэтэл МАН, АН-ын бүлгийн ажлын хэсэг уулзсан, хуралдсан гээд яриад байх юм. Өнөөдөр хуулиар УИХ-д гурван бүлэг ажилладаг. Манай бүлэг энэ хоёр бүлгийн ажлын хэсгийн хамтарсан хуралд оролцоогүй. Бид төсвийн тодотголыг хэлэлцээд явах нь зүйтэй гэж бодож байгаа. Хоёр бүлэг хуралдсан гээд сонсоход зохимжгүй байна.

1

УИХ-ын гишүүн Ч.Хүрэлбаатар: -Төсвийн тодотголоор баахан хөрөнгө оруулалтын жагсаалт байгаа. Төсвийг авлигажсан гэж Ерөнхий сайд хэлсэн. Гэтэл бид үүнийг хэлэлцээд, батлаад явахаар авлигажсан төсвийг дэмжсэн хэрэгт орно. Тийм учраас орхигдсон байгаа 292 объект дээр авлигажсан уу, үгүй юу гэдэг дээр эхлээд саналаа нэгтгэе. Үндэсний аудитын газарт манай намын бүлэг үүрэг өгсөн.

1

УИХ дахь МАН-ын бүлгийн дарга Н.Энхболд: -Нэг хэсэг нь түрэмгийлээд, хурал зарлаад олонхиороо шийдэх гээд байх албагүй. Жагсаалтад байгаа ажлуудынхаа учрыг олъё. Зураг төсөв, тендэргүй зүйлийг орхиод явахад болохгүй зүйлгүй. Харин ажил нь эхэлсэн объектуудыг гүйцэд дуусгах хэрэгтэй. Тэгэхгүй бол бид завсарлага авахаас өөр аргагүй. Хэрвээ манай бүлэг завсарлага авбал тав хоног хуралдаан хойшилно хэмээлээ.

1

Ийнхүү гишүүд хэлэлцэх эсэхээ шийдэх гэж байнгын хорооны хуралдааны танхимд цаг шахам маргалдаад хэн нь ч ялсангүй.

1

Н.Энх