Ц.Нямдорж гишүүн Төсвийн байнгын хорооны хуралдааны үеэр 20 шахам минут хуурай “агсам тавив”. Ер нь түүнийг үг хэлэх, загнах үед  гишүүдийн хэн ч өмнөөс нь сөрөгдөггүй. Чуулганы хуралдаанаар гишүүдэд асуулт асуух, үг хэлэх минут өгдөг болохоор гишүүд зарим тохиолдолд хугацаандаа үгээ багтаан хэлж амжихгүй “таслуулдаг”. Харин байнгын хорооны хуралдаанаар үг хэлэх эрх өгсөн бол автоматаар микрофоныг нь унтраагаад байхгүй, гишүүдийг үгээ хэлж дуустал хүлээхээс наашгүй байдаг. Энэ боломжийг гишүүд, тэр дундаа Ц.Нямдорж гишүүн тун овжиноор ашиглаж,  бухимдлаа “тайлав”.

1

Шадар сайд Д.Тэрбишдагва саяхан нэг хэвлэлд “Гишүүд хууль батлуулаад 10 хувийн авлига авдаг” хэмээн ярилцлага өгчээ. Д.Тэрбишдагва сайдтай угийн сөргөөцөлддөг Ц.Нямдорж гишүүний уур дээрх ярилцлагыг уншаад бүүр ч асчээ. Тэрбээр “Гишүүдээ 10 хувийн авлигаа авах гэж яараад байна уу, авчихсан авлигаа албажуулах  гэж яараад байна уу. Би бодитой юм ярьж байна шүү. Д.Тэрбишдагва гэдэг хүн хэвлэлд ярилцлага өгөхдөө “гишүүд 10 хувийн авлига авдаг”, Ерөнхий сайд нь “авлигажсан төсөв” гэж хэлсэн. Тэрбишдагва аа, чи 10 хувийн авлига авсан гишүүдийн жагсаалтыг ард түмэнд нэрлэж хэлж, тэгээд шорон руу явуул. Ингэхгүй бол ард түмэн 10 хувийн авлига авах гэж байна, эсвэл авсан авлигаа албажуулах гэж байна хэмээн ойлгоно. 70 хувийн хөрөнгө оруулалтыг тасалдуулчихаад 10 хувийн авлига авдаг гэж УИХ руугаа дайрч байгаа Засгийн газартай юу ярих юм” хэмээн давшлав.

1

Мөн тэрбээр “Долоон буудлын Должингийн хажууд сайд хариуцлага хүлээдгээрээ ялгаатай. Хагархай хэнгэрэг шиг сайд нартайгаа УИХ хариуцлага тооц” хэмээн сургамжлав.

1

Н.Нягт