“Мобиком”-ынхон гэрээт борлуулагчидтайгаа хамтарч ажиллах гэрээндээ өөрчлөлт оруулжээ. Ингэхдээ “Манай үүрэн холбооны нэгж зарвал заавал 94-тэй шинэ дугаараас арвыг борлуулж өг” гэсэн шаардлагыг тавьсан байна. Харин чадахгүй бол нэгж борлуулах гэрээ хийхгүй,  гэрээг сунгахгүй гэдгээ мэдэгджээ. Энэ талаар зарим гэрээт борлуулагч “Зах зээлд эрэлтгүй байгаа 94-тэй шинэ дугаараа зарахын тулд борлуулагч бүрт арав, арван дугаар шахаж байна. Нэг дугаарыг 4500 төгрөгөөр зарсан. Бидний зүгээс дугаарыг зарсны дараа тооцоогоо хийе гэсэн боловч хүлээж аваагүй” хэмээв. Тодруулбал, тус компанийнхан “Заавал дугаарын төлбөр болох 45 мянган төгрөгөө авчраад зарах нэгжээ ав” гэсэн шаардлага тавьж буй юм. 94-тэй дугаарыг хүмүүс авахгүй байгааг учирлаж, арвын арван дугаар авч алдагдалд ормооргүй байгаагаа хэлэхээр “Тэгвэл нэгж борлуулах гэрээ хийхгүй, сунгахгүй” гэж тулган шаардаж буй юм байна.  “Мобиком”-ын гэрээт борлуулагчид нэгж зарах эрхээ жил бүр тус компаниас авдаг байна. Гэрээний хугацаа нь дууссан борлуулагчид  “Мобиком”-оос шахаж буй 94-тэй дугаараас болж цаашид гэрээгээ сунгаж чадахгүй байдалд оржээ. Тэд тус үүрэн холбооны 100 мянган нэгжээс ердөө 3000 мянган төгрөгийн ашиг олдог байна. Энэ нь нэгжээс олсон орлогын гурван хувь юм. Уг нь шинэ гэрээгээр орлогын хувь нэгээр нэмэгдэх сайхан мэдээ байсан ч хариуд нь “агуулах”-ын бараагаа шахаж байгааг гэрээт борлуулагч Л.Төрбат хэллээ. Тэрээр өдөрт 50-70 мянган нэгж зарж 1500-2500 төгрөгийн ашиг олдог байна. Гэтэл сарын орлогоо хуримтлуулж байж 94-тэй арван дугаар авснаар гэрээгээ сунгах боломж бүрдэх талаар тэрээр ярьж байв.

А.Жаргал