МАН-ын XXVII их хурал таван өдөр үргэлжилж, намын дүрмээ шинэчлэн баталж,  намын дарга, бага хурлын гишүүдийг сонгосноор өнөөдөр өндөрлөлөө. Одоо Бага хурлын анхдугаар хуралдааныг хийж, намын Ерөнхий нарийн бичгийн дарга, Удирдах зөвлөлийн гишүүдийг сонгохоор төлөвлөөд байна. МАН-ын Ерөнхий нарийн бичгийн даргад Д.Цогтбаатар, Ж.Мөнхбат, Ж.Сүхбаатар, Б.Энхмандах нар албан ёсоор нэр дэвшихээ мэдэгдээд байгаа. Мөн МАН-ын дарга Ерөнхий нарийн бичгийн даргад нэр дэвших хүнээ санал болгох юм.

МАН-ын дарга М.Энхболд одоогийн нарийн бичгийн дарга Ж.Сүхбаатарыг санал болгох байх гэсэн таамаглал бага хурлын эргэн тойронд гарч байна. Нөгөөтэйгүүр намын Ерөнхий нарийн бичгийн даргад олон нэр дэвшигчийг өрсөлдүүлж, бага хурлын гишүүдийг хагаралдуулахгүй. Зөвхөн намын даргын санал болгосон эрхмийг дэмжинэ гэсэн хувилбар ч гарч байгаа бололтой. Юутай ч 14.00 цагт товлогдоод байсан бага хурал одоог хүртэл хараахан эхлээгүй байна. Үүнийг нь зарим ажиглагчид намын Ерөнхий нарийн бичгийн дарга хийгээд, Удирдах зөвлөлийн 21 гишүүн дээр зөвшилцөл явагдаж байгаатай холбон тайлбарлаж байгаа юм.

Н.Энх