Монгол Улсын Шадар сайд Д.Тэрбишдагва харъяа агентлагийн удирдлагуудтай хамтран Төрийн ордоны Г танхимд "Ард түмэн-Хаан" үндэсний форумын талаар мэдээлэл хийлээ. Соелын төв өргөөнд маргааш 09.00 цагт эхлэх энэхүү форумаар монголын хөгжил дэвшилд саад болж байгаа сөрөг зүйлүүдийг ил тод болгож, төр аж ахуйн нэгж, иргэний нийгмийн хамтын хүчээр шийдвжрлэх арга замыг хэлэлцэх аж.

Энэ жил уг форумыг "сахилга, хариуцлага" гэсэн уриан дор зохион байгуулах бөгөөд үндэсний баялаг бүтээх асар их нөөц, улс орны хөгжил дэвшлийн гол суурь болгон хэлэлцэх аж. Сахилга, хариуцлагатай байснаар хүн өөрийнхөө, гэр бүлийнхээ, байгууллага хамт олныхоо, улс эх орныхоо өмнөөс асуудалд ханддаг болно. Мөн хууль бус, нийтийн ашиг сонирхолд харшилсан үйлдэл хийхээм татгалзах, ёс суртахууны үүргээ биелүүлэх чадвар ч өндөр болно хэмээн Шадар сайд Д.Тэрбишдагва өгүүлж байлаа.

Хэлэлцүүлэгт Шадар сайдын мэдлийн агентлагууд болох “Стандартчилал хэмжил зүйн газар”, “Шударга өрсөлдөөн хэрэглэгчийн төлөө газар”, “Улсын бүртгэлийн ерөнхий газар” "Мэргэжлийн хяналтын ерөнхий газар", "Худалдан авах ажиллагааны газар", "Онцгой байдлын ерөнхий газар", УИХ, Засгийн газрын гишүүд, УИХ-ын Байнгын хорооны  дарга, гишүүд, НҮБ, Дэлхийн банкны суурин төлөөлөгчид болон нийслэл, орон нутгийн төрийн захиргаа, хувийн хэвшил, иргэний нийгмийн байгууллага, иргэдийн төлөөлөл зэрэг 1000 гаруй хүн оролцох юм байна.

П.Наран