УИХ-ын чуулганы өчигдрийн үдээс хойшхи хуралдаанд Улсын чанартай авто замын болон “Гудамж” төслийн талаар Ерөнхий сайдын Н.Алтанхуяг мэдээлэл хийсэн. Мэдээллийг “Гудамж” төсөл, улсын чанартай авто замын талаар гэсэн 2 хэсэгт хувааж танилцуулсан юм. Гудамж төсөл Хотын төв, Хурдны зам, Гэр хороолол гэсэн гурван дэд төслийг хэрэгжүүлэхээр болоод байгаа.

“Хурдны зам” дэд төсөлд Улаанбаатар хотын захуудыг холбосон хурдны замуудыг хэвтээ болон босоо тэнхлэгийн дагуу 6 чиглэлд тавихаар төлөвлөж байна. Энэхүү замын урт нь нийтдээ 125 км байна. Энгийн болон өндөр зам гэсэн хэлбэртэй байх аж.  Үүнээс энэ онд хэвтээ чиглэлийн Туулын хурдны зам, Сэлбэ голын хурдны зам ажлыг эхлүүлээд байгаа билээ. Туулын хурдны зам нь Баянзүрхийн товчоо-Азийн авто замын сүлжээний АН-3 тэнхлэг хүртлэх 30 километр байх бөгөөд одоогийн байдлаар байгаль орчинд нөлөөлөх ерөнхий болон нарийвчилсан үнэлгээг хийлгэж, анхан шатны зураг төсөл бэлэн болж, улаан шугам тавигджээ.

Сэлбэ голын хурдны зам нь Хандгайт-Яармаг чиглэлийн 32 км талбайг хамрах бөгөөд техник, эдийн засгийн үндэслэл боловсруулагдаж, замын анхан шатны төсөөлөл хийгджээ. Үлдэх босоо тэнхлэгийн Баянголын хурдны зам (Баянголын ам-Туул гол хүртэлх 15 км), Баянхошууны хурдны зам (Баянхошуу-Яармаг хүртэлх 23 км), Бэлхийн хурдны зам (Бэлхийн ам-Сэлбэ гол хүртэлх 9 км), Улиастайн хурдны зам (Улиастайн ам-Туул гол хүртэлх 13)-ууд нь 2016 он гэхэд ажлуудыг эхлүүлэхээр тооцож байгаа юм. “Гудамж” төслийн хурдны замын төслийн хүрээнд 3 ажлын 7.6 тэрбум төгрөгийн гэрээ байгуулж, 707.5 сая төгрөгийн санхүүжилтийг олгоод байгаа юм байна.

Д.Цэцэг