Хятадын Шинжаан мужид өнгөрсөн бямба гарагт цагдаагийн газар руу сүхээр зэвсэглэсэн этгээдүүд дайрч бослого гаргасны улмаас 11 хүн амь үрэгджээ. Амь үрэгдэгсдийн ес нь босогч, хоёр нь цагдаагийн албан хаагч байсан гэнэ. Бослого гаргасан шалтгаан тодорхойгүй байгаа аж. Харин Ардын армийн командлагч Вань И тус мужид шашны мөргөлдөөн байнга гарч буйтай уг хэрэг холбоотой гэж үзсэн байна.

Тэрбээр “Кашгар хотод байрлах Хятадын 785 дугаар цагдаагийн хэлтэс рүү дайрч, хоёр цагдаагийн аминд хүрсэн буруутнууд нь уйгар үндэстнүүд” гэжээ. Мөн халдлагын үеэр амиа алдсан гэмт этгээдүүдийн гэр бүлийнхнийг нь орон даяар хайж, шийтгэлийг нь хүлээлгэх болсон тухай мэдэгджээ. Үүнийгээ “Тэд гэмт хэрэг үйлдлээд амиа золиослох зэргээр хэргээс байнга зугтдаг. Харин жинхэнэ хэрэг үйлдэх сэдлийг өгч байдаг гэр бүлийнхэн нь ямар ч шийтгэлгүй үлддэг” гэж тайлбарласан байна.

Хятадын эрх баригчид Шинжааны бослогыг хүчээр дарж, үзэл бодлоор хавчиж байгаад нутгийн иргэд дургүйцлээ байнга илэрхийлдэг. Тян Ань Миний талбайд болсон дараалласан халдлагыг уйгур үндэстэнүүд зохион байгуулсан нь илэрсэн гэгдээд буй. Дээрх цагдаагийн байр руу дайрсан этгээдүүдээс баривчлагдсан таван хүнийг Хятадын ардын армийн нууц гянданд хорьж байгаа тухай “Ройтерс” агентлаг мэдээллээ.

Б.Дэлгэрцэцэг