УИХ-ын гишүүн Р.Амаржаргал бүрэн эрхээсээ чөлөөлөгдөх хүсэлтээ өгөөд байгаа. Үүнтэй холбогдуулан уг асуудлыг хэлэлцсэн эсэхийг Төрийн байгуулалтын байнгын хорооны дарга А.Бакейгаас тодрууллаа.

6

-Байнгын хорооны хуралдаанаар Р.Амаржаргал гишүүний асуудлыг хэлэлцсэн болов уу?

-Долоо хоног бүрийн хэлэлцэх асуудлыг УИХ-ын даргын дэргэдэх зөвлөлөөр хэлэлцээд баталдаг. Энэ долоо хоногийн төлөвлөгөөнд Р.Амаржаргал гишүүний өргөдөл багтаагүй байсан. Өчигдөр УИХ дахь АН-ын бүлгийн хуралдаанаар санал солилцсон. Р.Амаржаргал гишүүний асуудлыг хэлэлцэхээс өмнө намын дарга, холбогдох гишүүдтэй санал солилцож, зохих хэмжээний бололцоо олгоё. Р.Амаржаргал гишүүний хүсэлтийг хүлээн авах боломжгүй гэсэн дүгнэлтийг намын бүлгээс гаргасан.

6

-УИХ-ын дэгд энэ талаар яаж зохицуулсан байдаг бол?

-УИХ-ын дэгээр бол УИХ-ын гишүүд бүрэн эрхээсээ татгалзсан өргөдөл гаргасан тохиолдолд  төдий хугацаанд хэлэлцэн шийднэ гэсэн хуулийн заалт байхгүй.  Гишүүн Р.Амаржаргал өргөдөл өгсөн учраас хэлэлцэхийн хувьд хэлэлцэнэ. Гэхдээ аль аль талдаа  бодолцох, зөвшилцөх бололцоо олгож байна.

6

-Гишүүн өөрөө хүсэлт гаргасан тохиолдолд УИХ хүлээж авахгүй байх эрх зүйн үндэслэл бий юу?

-УИХ-ын тухай хуулийн дагуу УИХ-ын гишүүн ямар нэг шалтгаанаар бүрэн эрхээ хэрэгжүүлэх боломжгүй болох тохиолдол байгаа. Үүний нэг нь  “УИХ-ын  гишүүн өөр ажилд шилжих болон хүндэтгэн үзэх шалтгаанаар татгалзах өргөдлөө гаргасан тохиолдолд Төрийн байгуулалтын байнгын хороо санал дүгнэлт гаргаж, чуулганы нэгдсэн хуралдаан дээр нууц санал хураалтаар уг асуудлыг шийднэ” гэсэн хуулийн зохицуулалт байгаа. Хэдийгээр УИХ-ын гишүүн өргөдлөө гаргасан ч гэсэн эцсийн шийдвэр УИХ-ын нэгдсэн хуралдаан дээр гарна.

6

-Р.Амаржаргал гишүүн өөрөө үндэслэлээ тайлбарласан уу?

-Одоогоор Р.Амаржаргал гишүүн үндэслэлээ тайлбарлаагүй байна. Хүндэтгэх үзэх шалтгаан гэсэн ангилалд л тайлбарласан байгаа.  Өргөдлийг нь хэлэлцэх явцад шалтгаанаа өөрөө тайлбарлах байх.

6

Н.Энх