Энэ сарын 27-29-ний өдрүүдэд Бельги улсын нийслэл Брюссель хотноо  Дэлхийн эмэгтэй парламентчдын дээд хэмжээний уулзалт зохион байгуулагдаж, манай улсаас Ц.Оюунгэрэл сайд “Эмэгтэйчүүдийн манлайлал улс орны нийгмийг хэрхэн өөрчилж, сайжруулж чадах вэ?” сэдвээр хийгдсэн хэлэлцүүлэгт илтгэгчээр оролцож санал бодлоо хуваалцлаа.

Парламент дахь эмэгтэйчүүдийн энэхүү дээд хэмжээний чуулга уулзалтаар жендерийн ялгааг арилгах талаар Дэлхийн эдийн засгийн чуулга уулзалтаас гаргасан илтгэлд үндэслэн "Бүс нутгийн хэмжээнд эмэгтэйчүүдийн тэгш эрхийг хангахад амжилт гаргасан"  орныг шалгаруулжээ. Энэ төрөлд Зүүн Азийн бүсээс Монгол Улс шалгарч ССАЖ-ын сайд Ц. Оюунгэрэл уг шагналыг гардлаа.

Харин Ойрхи Дорнодын бүсээс тус шагналыг Израйль, Номхон Далайн бүсээс Шинэ Зеланд, Өмнөд болон Зүүн Өмнөд Азийн бүсээс Филиппин, Африкийн Саб Сахарын бүсээс Лесото авсан бол Европ болон Төв Азийн бүсээс Исланд, Өмнөд Америкийн бүсээс Боливи, Европын Холбооноос Финлянд улс хүртжээ.

Уг дээд хэмжээний чуулга уулзалтад эмэгтэй улс төрчдийн улс орны нийгэм, эдийн засаг, улс түмний найрамдал, энх тайван, аюулгүй байдалд оруулж буй хувь нэмэр, тэдгээрийн гүйцэтгэж буй үүргийн  талаар харилцан  ярилцаж, хэлэлцэн халуун яриа өрнүүлцгээж байна.

Анх 1893 оны 11 дүгээр сарын 28-ны өдөр Шинэ Зеланд улсад эмэгтэйчүүд үндэсний хэмжээнд санал өгөх эрхтэй болсноос хойш  эмэгтэйчүүд сонгуульд санал өгөх боломжтой болсон билээ. Ийнхүү эмэгтэйчүүд сонгуульд хүйсийн тэгш байдлаар ялгаваргүйгээр сонгох, сонгогдох эрхээ эдлээд  даруй 120 жил болжээ.

Б.Буд