Дархан-Уул аймгийн “Дархан-Уул аймгийн Ардчилсан намыг шинэчлэх хөдөлгөөн”-нийхөн яг одоо АН-ын төв байрны гадна улс төрийн суулт, жагсаал хийж байна. Уг жагсаалд 100 гаруй АНХ-ын гишүүд, дэмжигчид хүн оролцож байгаа аж.

Уг хөдөлгөөнийхөн намаа шинэчлэхийн тулд анхан шатны үүрүүдэд Ардчилсан намын үндсэн дүрмийн хүрээнд шударга сонгууль явуулж шийдвэрлэхийг хүсч байгаа аж. Тодруулбал, өнгөрсөн 11-р сарын 18-нд хуралдсан Хяналтын ерөнхий хорооны 02 тоот тогтоолыг хэрэгжүүлж өгөхийг Ардчилсан намын удирдлагуудаас хүссэн ч, тэд дорвитой хариулт ирүүлээгүй аж. Иймд  тэд өнөөдөр ийнхүү улс төрийн жагсаал хийж байгаа гэнэ.

Энэ талаар Дархан-Уул аймгийн АН-ын дарга Л.Наранбаатараас тодруулахад “Би өнөөдөр улс төрийн суултаа 12.00 цагт Зориг агсаны хөшөөнд хүндэтгэл үзүүлснээр эхэлсэн.  Өнөөдрийн улс төрийн суулт маань Дарханы Ардчилсан намд салхи оруулах цаг болсныг намын удирдлагуудад сануулах зорилготой. Энэ нам ахмад гишүүдээ харж үзэхгүй, шинэ залуу боловсон хүчнээр хүрээгээ тэлдэггүй, зөвхөн “Бурхан Халдун” группын хэдхэн ажилчны дунд л оршин тогтнож ирсэн. Үүнээс болж үе үеийн сонгуульд ялагдал хүлээсэн. Тухайлбал, Дархан-Уул аймгаас 2004 оны УИХ-ын сонгуульд Ардчилсан намаас нэр дэвшсэн гурван гишүүн сонгогдож байсан бол өнөөдөр Ардчилсан засаг барьж байгаа үед нэг ч гишүүнгүй байна. Орон нутагт тэр чигтээ ялагдсан. 18 багийн Засаг даргаас Ардчилсан намын нэг ч хүн байхгүй. Энэ мэтээс өмнөх удирдлагууд Дарханы Ардчилсан намыг хэрхэн удирдаж байсан нь харагдаж байгаа юм. Тиймээс өөрийн хүсэлтээр ажлаа хүлээлгээд өгөх хэрэгтэй байгаа юм. Үүнийг ч Дарханы мянга, мянган гишүүд дэмжигчид хүсч байгаа. Дархан-Уул аймгийн Ардчилсан намын дотоод ардчилалгүй, яг л коммунист нам шиг явж ирсэн” гэв.

Дашрамд дуулгахад, Ардчилсан намын Ерөнхий нарийн бичгийн дарга Ц.Оюундарь өнгөрсөн 11-р сард Дархан-Уул аймгийн Ардчилсан намын 600 гаруй гишүүдтэй хоёр удаа уулзалт хийсэн гэдэг. Уг уулзалтаар  анхан шатны үүрүүдээ хуралдуулж намын даргаа сонгох нь зөв гэсэн байр суурьт нэгдсэн аж. Тиймээс Хяналтын ерөнхий хорооны тогтоолыг хэрэгжүүлэхийг шаардаж, Ардчилсан намын дарга Н.Алтанхуяг болон Ерөнхий нарийн бичгийн дарга Ц.Оюундарь нарт шаардлага хүргүүлжээ. Гэвч уг шаардлагын хариулт өнөөг хүртэл ирээгүй байна.

Б.Одон

Гэрэл зургийг Б.Буд