Хичээлийн жил эхлээд хоёрдугаар улирал дуусгавар болж байгаа ч сурагчид дүрэмт хувцсаараа жигдэрч чадаагүй л байна. Бага ангийн сурагчдын дүрэмт хувцасны жигдрэлт 98 хувьтай яваа гэнэ. Гэвч заавар, журмын дагуу дүрэмт хувцас өмссөн бяцхан охид ангийн хөвгүүддээ “эмгэн, чавганц”-аараа хочлуулж байна. 100 гаруй мянган төгрөгөөр улсын заавраар хүүхэддээ худалдан авч өгсөн дүрэмт хувцас нь нэг хичээлийн жил байтугай нэг улирлын ая даахгүй бөөстөж, өнгө нь гандаж, сэмэрлээ. Зарим хүүхдэд дүрэмт хувцасны материалаас алергитаж, биед нь сөргөөр нөлөөлж байна гэсэн мэдээлэл ч байна. Уг нь дотоодын үйлдвэрүүд маань энэ хувцсыг үйлдвэрлэж байгаа юм билээ. Загвар, дизайн нь даанч болхи хийцтэй. Манай дотоодын үйлдвэрлэл хөгжиж байгаа гэдэг ч төрийн даалгасан ажилд хайнга, хоноцын сэтгэлгээгээр ханддаг муухай зан нь энэ удаад дахиад илэрлээ. Дүрэмт хувцасны размерийн хувьд ч хоёрхон сонголтой. Хүүхдийнхээ биеийн хэмжээнд тохируулан авч өгөх размер даанч алга. Тиймээс хувцсыг нь худалдан аваад, оёдолчинд очин биед нь тааруулан хасч, танаж, эсвэл нэмэлт хийлгэхээр өөр аргагүй.
.
Манайхан ЕБС-ийн сурагчдаа дүрэмт хувцсаар жигдрүүлэх гэж нэлээд чардайж байна. Социализмаас хойш дүрэмт хувцасны жигдрэлт сургууль сургуулийн мэдэлд очсон. Харин энэ хичээлийн жилээс ЕБС-ийн сурагчдыг дүрэмт хувцсаар жигдрүүлэхээр журам гарган хэрэгжүүлж эхэлсэн. Гэвч “бушуу туулай борвиндоо баастай” гэгчээр өнгөрсөн хичээлийн жил дуусгавар болж байх үед гаргасан энэ шийдвэр цаг хугацааны хувьд тун давчуу байлаа. Шийдвэр журмын дагуу сурагчдын дүрэмт хувцсыг үйлдвэрлэх дотоодын оёдлын үйлдвэрүүдийн дунд тендэр зарлаж, наймдугаар сарын нэгэн гэхэд сонгон шалгаруулалт нь эхэлсэн. Энэ хичээлийн жил эхлэхэд эцэг эхчүүд хүүхдүүддээ дүрэмт хувцас худалдан авахаар эрэлд гарсан. Харамсалтай нь дүрэмт хувцас үйлдвэрээсээ гарч дуусаагүй хичээлийн жилийн хоёр улирлыг үдлээ. Салбарын сайдын мэдээлж байгаагаар долоон тэрбум төгрөгийн дүрэмт хувцас үйлдвэрлэлийн шатанд байгаа гэсэн.
_
“Одоогийн байдлаар Боловсролын газруудын баталсан загварын дагуу эх орондоо үйлдвэрлэж байгаа шинэ загварын дүрэмт хувцсыг өмсөхөөр сонголтоо хийж, захиалга өгсөн сургуулиудын дүрэмт хувцасны борлуулалт нийслэлд 1-3 ангид 98 хувь, 4-5 дугаар ангид 40 орчим хувьтай байгаа. Дүрэмт хувцасны борлуулалтыг 12 дугаар сарын 25-нд улсын хэмжээнд дуусгахаар төлөвлөсөн байна” гэж БШУ-ы сайд мэдээллэсэн.
,
Сурагчид ирэх долоо хоногоос амарч эхэлнэ. Сургуулиудаас дүрэмт хувцасны жигдрэлтийг хангасан эсэх дээр боловсролын газраас байнга шалгалт ирж байгаа гэсэн. Тиймээс гуравдугаар улиралд орж ирэхдээ дүрэмт хувцсаа худалдан авсан байх зааврыг дунд, ахлах ангийн сурагчдад багш нар нь өгч байна лээ. Хичээлийн жилд талдаа орж, дуусгавар болох гэж байхад дунд, ахлах ангийнхны дүрэмт хувцас үйлдвэрээс гарч байна. Эцэг эхчүүд гуравдугаар улиралд хүүхдүүддээ дүрэмт хувцас худалдаж авч өгөх хэрэг байна уу, мөнгөний зарлага гэж байна. Энэ үнэн л дээ, ганц, хоёр удаа угаагаад л гандаж, “бөөстөж” байгаа дүрэмт хувцсыг хавар авч байхаар намар хичээлийн шинэ жил эхлэхэд нь худалдан авах нь өрхийн төсөвт ч, хүүхдүүдэд ч урамтай. Хичээлийн жил дуусах гэж байхад сургуулиа төгсч буй ахлах ангийнхан дүрэмт хувцас авах хэрэг ер нь байна уу.
,
Ирэх жил дүрэмт хувцасны чанар, хийц, загварт анхаарахыг хүсье. Жил бүр 100 гаруй мянган төгрөгөөр хүүхдүүддээ дүрэмт хувцас худалдан авч өгөх бэлтэй өрх хэд билээ. Тэр дундаа 2-3 хүүхэд сургуульд сурдаг эцэг эхчүүдийн өрхийн төсөвт бүр ч хүндрэлтэй тусна. Тиймээс хичээлийн жилийн төгсгөлд хүүхдүүддээ дүрэмт хувцас худалдан авч өгмөөргүй байна, сайд аа.
%
Н.Энхлэн