УИХ-ын  Нийгмийн бодлого, боловсрол, соёл, шинжлэх ухааны байнгын хороо өнөөдөр хуралдлаа. Хуралдаанаар дөрвөн сайдын мэдээллийг сонсохоор төлөвлөгдөөд байсан. Тухайлбал, Хүн амын хөгжил, нийгмийн хамгааллын сайд цалин, тэтгэвэр, тэтгэмжийн хэмжээг инфляцийн түвшин, хөдөлмөрийн бүтээмжтэй уялдуулан нэмэгдүүлэх талаар авч хэрэгжүүлж байгаа арга хэмжээний талаарх мэдээлнэ. Хөдөлмөрийн сайдын хувьд Жижиг, дунд үйлдвэрлэлийг хөгжүүлэх асуудлаар дэвшүүлсэн зорилтуудын өнөөгийн байдал, жижиг дунд үйлдвэрлэлийг дэмжих чиглэлээр хэрэгжүүлж байгаа үндэсний болон олон улсын төсөл хөтөлбөрүүдийн үр дүн, санхүүжилтийн байдал, тулгамдсан асуудлуудыг хэрхэн шийдвэрлэж байгаа талаар мэдээлнэ. Эрүүл мэндийн сайд эх, хүүхэд, ахмад настан, хөгжлийн бэрхшээлтэй иргэдэд үзүүлж байгаа эмнэлгийн тусламж, үйлчилгээний чанар, хүртээмжийг дээшлүүлэх, эх нялхсын эндэгдлийг бууруулах асуудлыг хэрхэн шийдвэрлэж байгаа болон цаашид авч хэрэгжүүлэх арга хэмжээний талаар мэдээлнэ. Харин Соёл, спорт, аялал жуулчлалын сайд Хүүхэд, залуучуудыг хөгжүүлэх зорилгоор хүүхдийн кино театр, усан бассейн, арилжааны телевизүүдийн бодлого, хөтөлбөр, нэвтрүүлгийн агуулгад тавьж байгаа хяналт, тэдгээр нь хүүхэд, залуучуудын соёл, хүмүүжил төлөвшилт хэрхэн нөлөөлж байгаа тухай мэдээлэл хийнэ хэмээн төлөвлөсөн байв.

 6

Гэвч Хөдөлмөрийн сайд Я.Санжмятав БНСУ-д албан томилолттой, Хүн амын хөгжил, нийгмийн хамгааллын сайд С.Эрдэнэ болон Эрүүл мэндийн сайд

хүрэлцэн ирээгүй учир мэдээлэл өгөхөөр ирсэн холбогдох албаныханыг гишүүд сонсохыг хүсээгүй юм. Тэд салбарын сайдаас нь мэдээлэл сонсох хүсэлтэй байгаагаа илэрхийлж байсан юм.

 6

Харин  хүүхэд, залуучуудыг хөгжүүлэх зорилгоор хүүхдийн кино театр, усан бассейн, арилжааны телевизүүдийн бодлого, хөтөлбөр, нэвтрүүлгийн агуулгад тавьж байгаа хяналт, тэдгээр нь хүүхэд, залуучуудын соёл, хүмүүжил төлөвшилт хэрхэн нөлөөлж байгаа тухай Соёл, спорт, аялал жуулчлалын сайд Ц.Оюунгэрэлийн мэдээллийг сонсч,  байнгын  хорооны гишүүд санал  хэлж, асуулт асуув.

_

Байнгын хорооны гишүүдийн зүгээс  Ц.Оюунгэрэл сайдын хийсэн мэдээлэлтэй холбогдуулан  хүүхэд залуучууд, тэр дундаа хөдөө орон нутгийн залууст чөлөөт цагаа өнгөрүүлэх газар хомс, соёлын төв, номын сан, музейн барилга байгууламж барих  хөрөнгийн эх үүсвэр муу, телевизийн хөтөлбөрийн агуулга   учир дутагдалтай зэрэг санал  шүүмжлэл хэлж байлаа.

.

УИХ-ын гишүүн Х.Энх-Амгалан:  МҮОНТ-ийн   программын хэдэн хувийг Монголын түүх соёлыг сурталчлах чиглэлийн нэвтрүүлэг эзэлж байна.  Яам хэрхэн хамтарч ажиллаж байна?

_

Ц.Оюунгэрэл: МҮОНТВ-тэй яам гэрээгүй. Гэхдээ радио телевизийн өргөн нэвтрүүлгийн тухай хуулийн төсөл боловсруулах ажил эхний шатандаа явж байна. Яваандаа агуулгын хувьд квоттой болгох тухай ярьж байгаа. Үүнтэй холбоотойгоор телевизийн нэвтрүүлгүүдийг хянах асуудал яригддаг.Өнөөдрийн байдлаар орон нутгийг оролцуулаад манай улсад 166 телевиз үйл ажиллагаа явуулж байна. Эдгээрийг хоногийн 24 цаг эфир гаргадаг гээд тооцвол багагүй тоо гарна. Өнгөрсөн онд 145 телевизээр тооцоолоход 3100 орчим цагийн программ өдөртөө олон нийтэд хүргэдэг гэсэн үг. Яамнаас өдөр бүр эдгээр сувгуудыг хянаж, сайн муу нэвтрүүлэг, хүүхэд залуучуудад хор нөлөөтэй гэдгээр нь ялгахад их төвөгтэй. Тиймээс агуулгыг нь хуульчилж, түүнийгээ хянах боломж бий. Ингэхдээ үндэсний хэв шинжийг агуулсан нийтлэл нэвтрүүлгийг нэмэгдүүлэх квот тавиад ирэхээр энэ асуудал аяндаа шийдэгдэнэ. Өнөөдөр гаргаж байгаа солонгос болон гадаадын элдэв хүчирхийлэлтэй кино, элдэв янзын нэвтрүүлгүүдийг шууд хориглож болохгүй нэвтрүүлгийн бодлогоор зохиостой түвшинд хянах нь чухал.

_ УИХ-ын гишүүн Ё.Отгонбаяр: Яамнаас кино урлагийн салбарт чухам ямар бодлого баримталж байна. Бодлогоо хэрэгжүүлэх ямар механизм баримталж байгаагаа  тодруулаач?

_ Ц.Оюунгэрэл: Яамны зүгээс киноны асуудалд хатуу бодлого баримталж байгаа. Монголын гурван кино  Пусаны кино наадамд өрсөлдөж, нэг бүтээл  нь гранпри шагнал хүртсэнийг дуулгая. Энэ гурван киноны нэг нь хүүхдийн "Шарга даага" нэртэй кино байгаа.  Хэрэгжүүлэх механизмийн тухайд  Харилцаа холбооны  газартай хамтраад агуулга талаас нь хуулийн төсөл боловсруулахаар ажиллаж байна.

_

УИХ-ын гишүүн  Г.Уянга: Төв бассейны захирал ГАрслан тус байгууллагын орлогыг 100 дахин нэмэгдүүлж чадсан. Гэтэл саяхан дээврээсээ нурахад хөрөнгө мөнгө байхгүй гээд сууж байна. Өөрийнх нь олсон орлогоос засварлаж болдоггүй юмуу?

_

Ц.Оюунгэрэл: Төв бассейн нийслэлийн өмчид багтдаг. Засвар үйлчилгээний  зардал нийслэл гаргах учиртай. Үүсээд байгаа эвдрэлийг засах хөрөнгө яаманд одоогоор байхгүй.

_

-Лениний музейн өмчлөлийн маргаан юу болсон бэ?

_

Ц.Оюунгэрэл: Гурван шатны шүүхийн  шийдвэр Лениний музейн барилга төрийн өмч болохыг тогтоосон. МАН-аас энэ асуудлаар Ерөнхий шүүгчид хандахаа мэдэгдсэн. 12 сарын 11-нээс   ирэх нэгдүгээр сарын 10-ны дотор гаргана. Үүнээс хойш 30 хоногийн дотор Ерөнхий шүүгч асуудлыг хэлэлцэнэ.

_

Циркийн хувьчлалыг буцааж болох уу гэж иргэд  их асуух юм. Циркчид бэлтгэлээ хийх талбайгүй, хэцүү байдалд байгаад анхаарал хандуулж байна уу?

_

Ц.Оюунгэрэл: Циркийн асуудалд яам оролцооч гэдэг. Гэтэл хувьчлалыг буцаах нь яамны ажил биш. Үүнийг  Төрийн өмчийн хороо шийдэх ёстой. Лениний музейн хувьд ямар ч хувьчлал болоогүй учраас яам оролцсон.

өыб Байнгын хорооны хурадааны үеэр сайдын  хийсэн мэдээлэлтэй холбогдуулан гишүүдээс олон санал, санаачлага гарсан тул Байнгын хорооноос тогтоол гаргаж, Засгийн газар, Сангийн яаманд хүргүүлэх нь зүйтэй гэж үзсэн.  Ингэхдээ УИХ-ын гишүүн Л.Энх-Амгалангаар ахлуулсан Ажлын хэсэг байгуулж, гишүүд сайн дураараа нэгдэж ажиллахаар тогтов. Тус ажлын хэсэг хүүхэд, залуучуудыг хөгжүүлэх зорилгоор хүүхдийн кино театр, усан бассейн, арилжааны телевизүүдийн бодлого, хөтөлбөр, нэвтрүүлгийн агуулгад тавьж байгаа хяналт, тэдгээр нь хүүхэд, залуучуудын соёл, хүмүүжил төлөвшилт хэрхэн нөлөөлж байгаа асуудлаар нарийвчлан судалж, анхааралтай хандаж, тогтоол болгон батлуулахаар боллоо.

.

П.Наран