УИХ-ын өнөөдрийн нэгдсэн хуралдаанаар байнгын хороодын дарга нарыг томиллоо. Төрийн байгуулалтын хорооны дарга А.Бакей, Хууль зүйн байнгын хорооны дарга Ш.Түвдэндорж, Эдийн засгийн байнгын хорооны дарга Б.Гарамгайбаатар, Байгаль, орчин хүнс, хөдөө аж ахуйн байнгын хорооны дарга Г.Баярсайхан, Өргөдлийн байнгын хорооны дарга Р.Бурмаа нарыг улираан ажиллуулахаар болсон бол Аюулгүй байдал, гадаад бодлогын хорооны даргаар УИХ дахь МҮАН-МАХН-ын “Шударга ёс” эвслийн бүлгээс гишүүн Ц.Оюунбаатар, Нийгмийн бодлого, боловсрол, соёл, шинжлэх ухааны байнгын хорооны даргаар УИХ дахь МҮАН-МАХН-ын “Шударга ёс” эвслийн бүлгээс гишүүн Д.Батцогт нарыг шинээр томиллоо.

Харин Төсвийн байнгын хорооны даргыг улираах эсвэл шинээр томилох эсэх нь тодорхойгүй хэвээр үлдлээ. Учир нь уг байнгын хороонд АН хүнээ томилох гэснээс болж байнгын хорооны даргын асуудал шийдэгдээгүй гэнэ. Хэрвээ энэ байнгын хорооны даргаар АН-ын бүлэг өөрийн хүнээ тавина гэвэл одоогийн дарга Ц.Даваасүрэн үүрэгт ажлаа өгч сул гишүүн болно гэсэн үг. Харин байнгын хорооны даргаар улирна гэвэл одоогийн нөхцөл байдлаас харвал түүнд АН-ыг сонгохоос өөр зам үлдэхгүй нь бололтой. Гэхдээ тэр хоёр сонголтын алийг нь сонгох бол?

Н.Нягт