Монголын хөлбөмбөгийн шигшээ багийн тоглогч А.Мөрөн Тайландын “FC Краби” багтай хоёр жилийн хугацаатай гэрээ байгуулж, нэгдүгээр лигт хүчин зүтгэхээр болсон билээ.

Тэрбээр багийн менежер болон холбогдох хүмүүсийн хамт өнөөдөр “UBS” телевизийн байранд хэвлэлийн хурал хийсэн. Энэ үеэр түүний ивээн тэтгэгч Акира сан гарын үсэгтэй өмсгөлийг нь худалдан авлаа. Уг өмсгөл нь 99 мянган төгрөгийн үнэтэй аж. Олон улсын жишгээр тамирчны албан ёсны нэртэй, оргиналь өмсгөл 50 долларын үнэтэй байдаг юм байна.

А.Мөрөнгийн ивээн тэтгэгч Япон улсын иргэн Акира сан нь манай улсад бизнес эрхлэн амьдардаг ба түүнийг гадаад дотоод явах зардал болон бусад зүйлээр ивээн тэтгэж, тусламж дэмжлэг үзүүлсээр иржээ. Харин “FC Карби” багийн менежер М.Такаши “Тухайн тоглогчийн өмсгөл дээр ивээн тэтгэгч компанийнх нь лого байдаг. Тухайлбал, манай багийнхны өмсгөл дээр ивээн тэтгэгч “Air Asia” компанийн лого бий. Үүний нэгэн адилаар Монголын томоохон компаниуд анхны мэргэжлийн хөлбөмбөгчин залуугаа дэмжиж, ивээн тэтгэн, өмсгөл дээр нь өөрсдийн логогоо байрлууна гэдэгт итгэлтэй байна. Мөн Тайланд руу Монголоос шууд нислэг хийдэг болохоор сонирхсон, хүссэн хүмүүс А.Мөрөнгийнхөө тоглолтыг газар дээрээс нь үзэж болно” гэж ярьж байсан.

Б.Буд