Цагдаагийн албаны тухай хуулийг мөрдөж эхэлсэнтэй холбогдуулан Хууль зүйн сайд Х.Тэмүүжин өнгөрөгч баасан гаригт ЦЕГ, УМБГ хоёрыг нэгтгэх тушаал гаргаж, бүтэц бүрэлдэхүүнд өөрчлөлт хийжээ. Өөрөөр хэлбэл, оны өмнө 60 хүнтэй байсан ЦЕГ шинэ бүтцээрээ 157 хүнтэй болж өргөжүүлсэн байна. Харин 200 албан албан хаагчтай үйл ажиллагаагаа явуулж байсан УМБГ шинэ бүтцээр 60 хүнтэй болсон байна.  Энэ тухайгаа эрхэм сайд тайлбарлахдаа “Улсын хэмжээнд онц хүнд, зохион байгуулалттай хэрэг мөрдөж буй хоёр байгууллагыг нэгтгэн цомхон, чадварлаг бүрэлдэхүүнээр ажлыг явуулна” гэжээ.

Мөн ЦЕГ-ыг гурван дэд даргатай болгосон. Тодруулбал, С.Баатаржав, Ж.Ганбаатар нэр дээр нэмж Д.Эрдэнэбаатарыг дэд даргаар томилоод байгаа аж. Тэрээр ЦЕГ-ын Аюулгүй байдал хариуцсан дэд даргаар ажиллах юм.

Түүнчлэн, Х.Тэмүүжин сайдын тушаалаар ЦЕГ-ын Захиргааны удирдлагын газрыг татан буулгаж, тус газрын дарга, хурандаа Д.Адъяабазарыг албан тушаалаас нь чөлөөлжээ. Үүнээс гадна ЦЕГ-ын Хүний нөөцийн хэлтсийн дэд дарга Г.Баясгаланбатыг чөлөөлж, оронд нь О.Мөнхбатыг томилсон бол Дотоодын цэргийн штабын хэлтсийн дарга, хурандаа Ж.Амгаланг шинээр байгуулагдаж байгаа Олон нийтийн аюулгүй байдлыг хангах хэлтсийн даргаа томилсон байна.

Б.Одон