Өнөөдөр сагсан бөмбөгийн тамирчин асан Деннис Родман Хойд Солонгосын нийслэл Пхеньянд буужээ. Тэрбээр “NBA”-гийн ахмад тоглогчид болон Хойд Солонгосын шигшээ багийн нөхөрсөг тоглолтыг зохион байгуулахаар дөрөв дэх удаагаа ирлээ. Родмантай хамт Кенни Андерсон, Клиффорд Робинсон, Вин Бейкер, Крейг Хожес, Даг Кристи, Чарльз Смит нар Солонгост очсон байна. Энэхүү нөхөрсөг тоглолт маргааш Пхеньяны “Чинган” спорт цогцолборт болно.

Родман Хойд Солонгост очихоосоо өмнө Бээжин хотод хэвлэлийн хурал хийж, “Энэ тэмцээн миний дотны анд Ким Чен Уны 31 насны төрсөн өдөрт зориулагдаж байгаа. Тус тоглолт улс төрийн ямар ч зорилгогүй” хэмээн мэдэгджээ.

АНУ-ын Төрийн департаментаас Деннис Родман нь АНУ-ыг төлөөлөөгүй хэмээн мэдэгдсэн байна.

Б.Дэлгэрцэцэг