Засгийн газрын тогтоолоор аж ахуй эрхлэгчдийн ус ашигласны төлбөрийг шинэчлэн баталсан билээ. Хэрвээ аж ахуй эрхлэгч хүнд үйлдвэрлэл эрхэлдэг бол 1 шоо метр усанд 176 төгрөг  60 мөнгөний төлбөр төлөх юм байна. Харин барилга, барилгын материалын үйлдвэрлэл эрхэлдэг бол ашигласан усныхаа шоометр тутамд 103 төгрөг 30 мөнгө төлнө. Архи, пиво, согтууруулах ундаа үйлдвэрлэгчийн тухайд шоометр ус тутамд 103 төгрөг 30 мөнгө төлөх аж.  

Нэг ёсондоо аж ахуйн нэгж ямар үйлдвэрлэл, үйлчилгээ явуулж буйгаас хамааран усны нөөц ашигласны төлбөр төлдөг. Харин шинэчлэн баталсан тогтоолоор хэн усыг үрэлгэн зарцуулж байна, тэр өндөр төлбөр төлөх юм. Харин үр ашигтай ашиглах, бохирдлыг бууруулах, цэвэршүүлэх чиглэлээр дэвшилтэт технологи нэвтрүүлж усыг хэмнэлттэй ашиглавал бага төлбөр төлөх аж. Түүнчлэн төлбөрийн хэмжээг бүс нутгийн онцлог, сав газар тус бүрээр тооцон тогтоожээ. Гэтэл Туул голын сав газарт хамгийн өндөр үзүүлэлт гарсан байна. Тухайлбал, Туул голын усыг ашиглаж буй дэлгүүр, буудал, машин угаалга зэрэг үйлчилгээний газрууд,  архи, ундааны үйлдвэрүүдийн төлбөр өмнөхөөсөө 3.3,  хөнгөн хүнснийх 2.3 дахин өсчээ.

А.Жаргал