УИХ-ын чуулганы үдээс хойшхи нэгдсэн хуралдаан  Эрүүгийн хуульд нэмэлт өөрчлөлт оруулах тухай хуулийн төсөлд нэмэлт өөрчлөлт оруулах тухай хуулийн төслийг хэлэлцсэнээр эхлэв. Дэгийн тухай хуулийн дагуу гишүүн О.Баасанхүү, Тэмүүжин нараас өргөн мэдүүлсэн Нийтийн албаны тухай хуульд өөрчлөлт оруулах тухай хуулийн төслөө татан авч байгааг мэдэгдсэнийг  УИХ-ын дарга  танилцуулав. Харин үүнд УИХ-ын гишүүн Ц.Нямдорж шүүмжлэлтэй хандлаа. Тэрбээр  “Өдөр болгон нэг хуулийн төсөл татаж байна. Ингэж татах байсан юм бол юу гэж санаачилсан юм. Яамдаас санал, Засгийн газраас зөвшөөрөл авч байж  УИХ дээр хуулийн төсөл оруулж ирж байгаа. Хууль санаачлах ажлын цаана олон хүмүүсийг үймүүлдэг. Хууль санаачлах эрхтэй 77 субъект санаачлаад, хэлэлцүүлдэг дэглэмд шилжмээр байна. Үүнийг цаашдаа гишүүд анхаармаар байна шүү. Энэ хооронд хэчнээн цаг, цаас, мөнгө гарч байгааг мэдэж баймаар юм. Төрөөр битгий тоглоод бай гэлээ.

Үнэндээ ч УИХ-ын дарга  чуулганы нэгдсэн хуралдааны эхэн бүрт хэн нэг гишүүн санаачилсан  төслөө татан авч байгаа талаар мэдээлж байгаа билээ. Хууль санаачлагачид хуулиа боловсруулахын тулд  холбогдох мэргэжлийн хүмүүсээр судалгаа хийлгэж, тухайн салбарын хүмүүсийн сэтгэлзүйд нөлөөлж, цаашлаад УИХ-д өргөн барихад гишүүд түүнийг нь уншиж, танилцдаг гээд олон үе шат дамждаг билээ. Харин санаачилсан хуулийн төслөө татан авах болсон шалтгаанаа тодорхой дурдаж баймаар юм.  Баахан хүмүүсээр судлуулж, шүүлгүүлж, уншуулж, бэлтгүүлчихээд шалтгаангүй татаад авчихдаг гэм манай түшээдэд байна аа.

5

Н.Нягт