Хурууны хээгээр ирцээ бүрдүүлж, саналаа өгөх асуудал гишүүдийг  дарга, цэргээр нь талцуулаад авав. Хуралдаандаа суудаггүй, хүний өмнөөс  кноп дардаг дэггүй гишүүдийн хариуцлагыг өндөржүүлэхээр   цөөнхийн болон олонхийн бүлгийн дарга нар УИХ-ын Дэгийн тухай хуульд өөрчлөлт оруулахаар болсон. УИХ-ын Тамгын газар нь ч 28 саяар хурууны хээгээр ирц бүрдүүлдэг автомат тоног төхөөрөмжийг нь хууль төрөхөөс өмнө худалдаад авчихсан байлаа. Хурууны хээгээр ирцээ бүртгүүлнэ гэдэг гутамшигтай зүйл гэж зарим гишүүд эсэргүүцэж байсан юм. Тиймээс ч С.Баярцогт гишүүн энэ хуулийн төслийг гишүүдийн 3/2-оор  дэмжигдсэн тохиолдолд баталъя гэсэн зарчмын зөрүүтэй санал гаргасан. Гэхдээ түүний гаргасан санал дэмжигдэхгүй гэдгийг тэрбээр парламентад суусан дурсамжаараа ч, туршлагаараа ч мэдэж байсан бололтой. Тиймээс “та нарыг хурууны хээгээр саналаа өгөхийг чинь харъя. Миний саналыг та нар дэмжихгүй л дээ.  Дарга сэтэртэй энэ нөхөд  /С.Бямбацогт, Д.Эрдэнэбат нарын бүлгийн дарга нар руу зааж/ төслөө татаад авчих хэрэгтэй. Та нар насаараа дарга явж, сансар нисээрэй” хэмээн хатгаж байв.  Энэ бүхэнд эгдүүцсэн УИХ дахь АН, МАН-ын бүлгийн дарга нар гишүүдийн хариуцлагыг дээшлүүлэх гэж уг хуулийн төслийг  өргөн барьсанаа дуулгаад, хоёр төслөө нэгтгэн оруулж ирэхээр болж, татаж авлаа.

Н.Нягт