Францын Ерөнхийлөгч Франсуа Олландын нууц амраг Жули Гайе өөрийнх нь тухай бичсэн “Closer” сэтгүүлийг шүүхэд дуудсан тухай “ВВС” агентлаг мэдээллээ. Тэрбээр хувийн амьдралын нууцыг нь дэлгэсний нөхөн төлбөр гэж 50 мянган евро, шүүхийн зардал гэж 4000 еврог тус сэтгүүлээс шаардаж гомдол гаргасан байна. Францын хуулиар “хувийн нууцыг задруулсан” нь тогтоогдвол мөнгөн торгууль ногдуулахаас гадна нэг жил хүртэл хугацаагаар шоронд хорих ялаар шийтгэдэг юм байна.

Ерөнхийлөгч Франсуа Олланд “Closer” сэтгүүлийг энэ хэргийн дараа нухацтай авч үзнэ хэмээн өөрийн блогтоо бичжээ. Тэрбээр “Би маш олон удаа хэлсэн, хүний хувийн нууц бол дархан цаазтай газар гэсэн үг. Миний талаар сүүлийн үед сайн муу асуудал зөндөө яригдаж байгаа. Ирэх сарын 7-нд болох айлчлалаа өндөрлөсөний дараа “Closer” сэтгүүлтэй нэгийгээ үзэх болно. Тэгэхдээ би албан тушаалаа ашиглахгүй”  гэжээ. Франсуа Олланд жүжигчин хүүхэнтэй амрагийн холбоотой гэдгээ үгүйсгээгүй төдийгүй тэргүүн хатагтайн үүрэг гүйцэтгэгч, Валери Триервейлертэй харилцаа сайнгүй байгаа гэдгээ мөн бичсэн байна.

“France news” сонины өнөөдрийн дугаарт “Тэргүүн хатагтай Валерийн хэвтэж буй эмнэлэгт Ерөнхийлөгч ганц удаа очоогүй. Түүний энэ үйлдлээс болж Валери гомдож хоолноос гарч, долоо хоногийн дотор зургаан кг турсан” гэж бичжээ.

Б.Дэлгэрцэцэг