УИХ-ын чуулганы нэгдсэн хуралдаан эхэллээ. Хуралдаанаар Авлигын эсрэг хуульд нэмэлт өөрчлөлт оруулах тухай болон дагалдах хуулийн төслүүдийн эцсийн хэлэлцүүлгийг хийж байна. Хэлэлцэж байгаа асуудалтай холбогдуулан гишүүд асуулт тавьж байна.

УИХ-ын гишүүн Ц.Нямдорж:

-УИХ Хуульчийн эрх зүйн байдлын тухай хуулийг батлахдаа цэргийн албан хаагчийн нийгмийн халамж, хамгааллын тухай заалтыг оруулсан. Гэтэл АТГ-ын албан хаагчийг цэргийн тэтгэвэр, тэтгэмжид хамруулна гэж байна. АТГ-ынхны нийгмийн хамгааллыг Хуульчийн эрх зүйн байдлын хуулиар  явуулах нь зүйтэй гэж бодож байна. Олонхиороо энэ хуулийг баталж болно. Гэхдээ цэцэрлэгийн хүүхдүүд шиг тоглож болохгүй. Би энэ хуулийг дэмжиж байгаа боловч эрх баригчдаас логиктой зүйл хийгээч гээд байгаа юм.

Хуульзүйн байнгын хорооны дарга Ш.Түвдэндорж:

-Таны үгийг олон сонсоод цээжилж байна. Байнга л хүний нэр төр лүү  халдаж байх юм. Би тэвчээд л байгаа шүү.

УИХ-ын гишүүн Ц.Нямдорж:

-Би Хуульзүйн байнгын хорооны нэр төрд халдаагүй шүү. Халдах нэр төртэй байж яриарай, Түвдэндорж оо. Согтуу хүн шиг ажиллаж байгаа, чи өөрөө ажлаа хийхгүй байгаа шүү дээ. Ажилдаа ирж сурчихаад нэр төрөө яриарай. Чи тааллаарай ажилдаа ирдэг хоёр дахь Ерөнхийлөгч болчихсон шүү дээ.  Яагаад энэ хуулийг батлагдсан өдрөөс нь хэрэгжүүлнэ гээд яараад байгаа юм.

Хуульзүйн байнгын хорооны дарга Ш.Түвдэндорж:

-Хэрүүл хиймээргүй байна. Миний биш бусдын нэр төрд халдахаа болих хэрэгтэй. Батлагдсан өдрөөс нь дагаж мөрдье гэж олонхиороо ярьсан. Ц.Нямдорж гуай та ахмад, бид залуу улс. Алдаа гаргахыг үгүйсгэхгүй. Таны хуулийн салбарт хийсэн сайн зүйл нь саараасаа их байгаа. Таныг би хүндэтгэж явдаг.Ийнхүү асуулт хариулт явуулсны дараагаар Авлигын эсрэг хуульд нэмэлт өөрчлөлт оруулах тухай хуулийн төслийг батлах санал хураалт явуулахад гишүүдийн олонхи нь дэмжив. Харин Ц.Нямдорж гишүүний гаргасан зарчмын зөрүүтэй саналыг дахин хэлэлцэхээр боллоо.

5