Сангийн яам, Татварын мэргэшсэн зөвлөхийн нийгэмлэг хамтран “Санхүүгийн баримт нотолгооны залиланг таслан зогсоох зарим асуудал” сэдэвт хэлэлцүүлгийг өнөөдөр зохион байгууллаа. Хэлэлцүүлэгт татварын мэргэшсэн зөвлөхүүд, Авлигатай тэмцэх газар, Сангийн яам зэрэг байгууллагын төлөөлөл оролцсон юм. Энэ үеэр санхүүгийн татварын тайлан, үүнийг илтгэхэд хэрэглэгддэг анхан шатны баримтуудын талаар болон анхан шатны баримтуудыг хуурамчаар үйлдэгдэх тохиолдол манайд хэр их байгаа, үүнээс гарах сөрөг үр дагаварын тухай хэлэлцсэн юм.

Хэлэлцүүлгийн үеэр өнөөдрийн хууль эрхзүйн орчны хоцрогдлын талаар их хөндөгдөж байв. Жишээ нь, өнөөдөр цахим хэлбэрээр гүйлгээ хийгдэх нь их болж, үүнийгээ дагаад баримтууд нь ч биетээр бус электрон хэлбэрээр ирэх болжээ. Гэтэл үүнийг зохицуулсан заавар журам манайд байдаггүй аж. Энэ нь нягтлан бодогч, татвар төлөгчид, санхүүгийн луйварыг шалган тогтоодог байгууллагуудад ч маш их хүндрэл учруулж буйг хэлэлцүүлэгт оролцогчид хэлж байсан юм.

А.Жаргал