Эрдэнэс Тавантолгой компанийн гүйцэтгэх захирал Австрали эрхэм сонгогдсон. Харин одоо Тавантолгойн ордод хөрс хуулж, нүүрс олборлох гэрээт ажилчин сонгох шалгаруулахад өрсөлдөж байгаа компаниудын ихэнх нь Австралийн компаниуд байна.

Тавантолгойн оператораар ажиллах хүсэлтэй Австралийн Лейтон, Мак махон компаниуд хамтран "Мак махон ба Лейтон" хэмээх хамтарсан компани байгуулж "ВНВ Billiton" компаниас 500 сая ам.долларын өртөгтэй ажил авсан байна.

Сүүлийн мэдээллээр БНХАУ-д 463 сая ам.долларын дэд бүтцийн төслийг хэрэгжүүлэх гүйцэтгэгчээр шалгарсан байна. Мөн "Лейтон холдингс" компани Монгол Улсын Тавантолгойн ордын нүүрсний олборлолт хийх эрхийг бараг л авна гэдэгтээ итгэлтэй байна гэж удирдлагууд нь гадаадын хэвлэлд өгсөн ярилцлагадаа дурджээ.

Түүнчлэн өөрийн цахим хуудастаа дэлхийд танигдсан Тавантолгойн орд газрын хажууд үйл ажиллагаа явуулж байгаагаа бахархан зарласан нь хөрөнгийн зах зээл дээрх хувьцааныхаа үнийг өсгөх сайн арга болсон юм.

Нэг  эзэнтэй хэрнээ хоёр  өөр нэрээр тавантолгойд гар дүрэх гэсэн Австралийн энэ компани олборлогчийн тендэрт ялвал тавантолгойн уурхайн ажил зөвхөн нэг орноос хамаардаг болно. Эдийн засгийн суурь салбарт геополитикийн тэнцвэрт байдал алдагдаж, хараат байдал үүсэх юм.

Гадаадын нэг компани манай улсын стратегийн ач холбогдол бүхий салбарт хяналтаа тогтоовол уул уурхайн салбар нэг компанийн хяналтад орж үнийн бодлого зэргээр өөртөө ашигтай нөхцлийг тулган шаардах гээд урьдчилан тааварлаж үл болох олон нөхцөл байдал үүснэ. Эцэст нь монголчууд сар бүр 21 мянган төгрөг л аваад, хувьцаа гэсэн цаасаа барьж хоцрох эрсдэл байгааг зарим геополитикчид хэлж байгаа юм.