УИХ дахь АН-ын бүлгийн дарга Д.Эрдэнэбат энэ долоо хоногт чуулганы нэгдсэн хуралдаанаар хэлэлцэгдэн батлагдсан хуулийн төсөл болон цаг үеийн асуудлаар сэтгүүлчдэд мэдээлэл өглөө. Тэрбээр мэдээлэлдээ “Бид өнгөрсөн жилээс халамжийн бодлогыг шинэчилж, бэлэнчлэх сэтгэлгээнээс салах, аль болох бүтээн байгуулалтад чиглэсэн, ард иргэд маань хөдөлмөрлөөд, үүнийхээ үр дүнд амьдрал нь дээшилдэг байх нөхцөлийг хангах хууль эрх зүйн орчныг  бүрдүүлэхээр УИХ-ын бодлогыг тодорхойлсон. Энэ бодлогоо тууштай хэрэгжүүлж байгаа. Хамтын тэтгэврийн тухай хууль нь улсын төсвөөс мөнгө шаардахгүйгээр өрхийг дэмжих чиглэлд хамгийн зөв гарц болсон гэдэг утгаар нь УИХ дэмжих ёстой. Харамсалтай нь МАН-ын бүлэг энэ асуудлаар завсарлага авчихлаа” гэв. Мөн олон сар дамжин хэлэлцсэн Ашигт малтмалын тухай хуульд өөрчлөлт оруулснаар “Монголын алт монголдоо үлдэх бололцоог нээж, үйлдвэрлэлийг дэмжих, валютын ханш болон бараа бүтээгдэхүүний үнийг тогтвортой барихад чухал ач холбогдолтой хууль болсох” хэмээн байр сууриа илэрхийлэв.

1

“Энд Оюутолгойтой холбоотой асуудал байхгүй. Биет бусаар гэсэн ойлголтыг хуулийг хэлэлцүүлэх явцад хассан. Тиймээс Ашигт малтмалын тухай хууль монголчуудад ашигтай. Эдийн засагт уул уурхайн салбар зонхилж байгаа энэ цаг үед уул уурхайн асуүдлыг хуульд зөв зохистой тусгаж өгөх нь чухал юм. 2014 онд төсвийн мөнгө, бонд, хөнгөлөлттэй зээлээр аж ахуйн нэгжүүдийнхээ хөрөнгө оруулалтыг дэмжиж, бүтээн байгуулалтад оролцуулахыг гол зорилго болгон ажиллаж байна. Импортыг хязгаарлаж, дотоодын үйлдвэрлэлийг дэмжин, иргэдийнхээ бодит орлогод чиглүүлэх замаар экспорт, импортын зөв зохицуулалтад анхаарч байгааг, мөн эдийн засгийн асуудлаар улс төрийн намууд нэг ойлголцолд хүрэх шаардлагатай. НӨАТ ногдуулах борлуулалтын орлогын босго 10 сая төгрөг байсныг 50 сая төгрөг болгох хуулийн төслийг Засгийн газраас оруулж ирсэн. Энэ нь жижиг аж ахуйн нэгжүүдэд маш том дэмжлэг болно. Энэ мэтчилэн бодит эдийн засгийг дэмжсэн хууль, эрхзүйн шинэчлэл рүү явж байна” гэлээ. АН-ын бүлгийн дарга Д.Эрдэнэбат мэдээлэл хийснийхээ дараа сэтгүүлчдийн асуултад хариулсан юм.

12

-УИХ-ын намрын чуулган хэзээ завсарлах вэ? 2014 оны төсвийн тодотголыг хэлэлцэхтэй холбогдуулан ээлжит бус чуулган зарлахаас аргагүй тухай яригдаж байгаа. Өнөөдөр хуралдсан УИХ-ын даргын дэргэдэх зөвлөл энэ асуудлыг ярилцсан уу?

-Төсвийн тодотголтой холбоотойгоор ээлжит бус чуулган зарлана. Цагаан сарын дараа хөрөнгө оруулалтыг царцаасан аудитын шалгалтын дүнг УИХ-аар  сонсоно. Үүний дараа Засгийн газар 2014 оны төсвийн тодотголыг УИХ-д оруулж ирэх ёстой. Нийт 243 объектоос хэдийг нь 2014 оны төсвийн тодотголд суулгах вэ гэдгийг ээлжит бус чуулганаар шийднэ.

1

-Монгол Улсын Ерөнхийлөгчийн өргөн мэдүүлсэн Засгийн газрын тухай хуульд өөрчлөлт оруулах тухай хуулийн төслийг УИХ-аар хэлэлцэх үед УИХ дахь АН-ын бүлэг завсарлага авсан. Та завсарлага авах болсон үндэслэлээ нэгдсэн байр сууринд хүрэх шаардлагатай байна гэсэн. Түүнээс болсон уу, Засгийн газар огцрох магадлалтай боллоо гэх яриа бас дуулдах болов?

-Ямар нэг хуулийн өөрчлөлтөөр Засгийн газрыг огцруулж болохгүй. Засгийн газрын тухай хуульд заасан тодорхой үндэслэлүүдээр л огцруулах асуудал тавигдах ёстой.  Давхар дээлтэй холбоотойгоор бидний санал зөрөлдөж байгаа гол зүйл нь хууль үйлчлэх хугацаа. Бид завсарлага авахдаа энэ нь зөвхөн АН-тай холбоотой гэж үзэж завсарлага аваагүй. Монгол Улсын төрийн төлөвшил, улс төрийн тогтолцоо, цаашдаа парламент, Засгийн газрын харилцан тэнцвэрт байдал яаж хадгалагдах вэ гэдэг асуудлыг цогцоор нь шийдэх ёстой гэдэг байр суурин дээр байгаа. Түүнээс биш давхар дээлийг дан болгох тухай яриа байж болохгүй. Монгол Улсын төр цаашдаа олонх, цөөнхөөрөө хуваагдмал байдалтай байж болох юм уу гэдэгт хариулт нь болох ёстой хууль учраас нухацтай авч үзэх ёстой гэж үзсэн. Өөрөөр хэлбэл, улс төрийн намууд харилцан ойлголцож нэгдсэн шийдвэр гаргах ёстой. Монгол Улсын Үндсэн хуульд заасан тогтолцоогоор өнөөдөр олонхи нь Засгийн газраа барьж байгаа. Олон жил ийм зарчмаар төрийг жолоодож ирсэн. Гэвч нөгөө талдаа хоёр хуваагддаг өвчин газар авсан. Энэ хуваагдлыг байхгүй болгохын тулд эрх зүйн суурь хуулиудыг шинэчилж өөрчлөх зайлшгүй шаардлага бас үүсч байгаа.

1

-1.5 тэрбум төгрөгнөөс доош татварын орлоготой аж ахуйн нэгжийн төлсөн татварын 90 хувийг буцаан олгосноор төсвийн орлого хэдий хэмжээгээр буурах вэ? Энэ хууль батлагдсан тохиолдолд хэчнээн аж ахуйн нэгж хамрагдах боломжтой, хэдий хэмжээний татварын чөлөөлөлт үүсэх бол?

-1.5 тэрбумаас доош төгрөгийн борлуулалтын орлоготой аж ахуйн нэгжийн төлсөн татварын 90 хувийг чөлөөлснөөр төсөвт дарамт уүүсэхгүй. Нэгэнт дарамт учруулахгүй болохоор аж ахуйн нэгжээсээ татвар авах нь буруу гэж үзэж байгаа. Ойролцоогоор тавиад тэрбум төгрөгийн чөлөөлөлт үүсэх юм билээ. Үүнийг төсөв даагаад явах бололцоотой гэж Засгийн газар үзсэн.

1

-Хамтын тэтгэврийн тухай хуулийн төслийг УИХ-аар баталсан нөхцөлд төсвөөс нэмэлт санхүүжилт шаардах уу?

-Хамтын тэтгэврийн тухай хуулийн төслийг санаачлагчдын хэлж байгаагаар тэтгэврийн сангаас нэмэлт санхүүжилт авахгүйгээр шийдэх боломжтой юм билээ. Гэхдээ МАН-ын бүлэг арай өөр тайлбар хэлж завсарлага авсан болохоор төсөл санаачлагчид тооцоо судалгаагаа гаргаад үзүүлэх ёстой байх.

1

Н.Энх