“Erdene Resource Development” компани “Алтан нар” орд дээр өнгөрсөн улиралд явуулсан судалгааны эцсийн дүгнэлтээ танилцуулсны дараа Торонтогийн Хөрөнгийн бирж  дээр тус компанийн хувьцааны ханш 40 орчим хувиар өсчээ Баянхонгор аймагт байрладаг “Алтан нар” орд нь Оюутолгойгоос хойш Монголд илэрсэн хамгийн ач холбогдолтой металлын орд болохыг “Erdene Resource Development”-ийн ерөнхийлөгч мэдэгдсэн байна.

Судалгааны дүнд “Алтан нар” ордын “Union North” гэж нэрлэгддэг хэсэгт 19 метрийн гүн дэх нэг тонн хөрс тутамд 8.9 грамм алт, 66 грамм мөнгө болон бусад металл байгааг тогтоожээ. Мөн 7 метрийн гүнд тонн хөрс тутамд 20.2 грамм алт, 138 грамм мөнгө байгаа гэж үзсэн байна. Харин “Union South” гэж нэрлэгддэг хэсэгт 10 метрийн гүнд тонн хөрс тутамд 4.5 грамм алт, 9 грамм мөнгө байгааг тогтоосон байна. Түүнчлэн цаашид нэмэлт хайгуул хийх шаардлагатай байгаа гэж “Erdene Resource Development” компаниас гаргасан мэдэгдэлд дурдсан байна.

А.Жаргал