АНУ-ын Үндэсний аюулгүй байдлын албаны экс ажилтан Эдвард Сноуден Германы “ARD TV” телевизэд ярилцлага өгөхдөө нэгэн нууц задалсан тухай “ВВС” агентлаг мэдээллээ. Тэрбээр “АНУ-ын Үндэсний аюулгүй байдлын алба Германы үйлдвэрийн томоохон хувьцаа эзэмшигч эздийг тандаж, туршиж, байнга утасны яриаг нь чагнадаг байсан” хэмээн ярьжээ. Мөн ““NSA” сүүлийн таван жилийн хугацаанд АНУ-ын фирмүүдтэй өрсөлдөгч Германы томоохон компаниудыг тандаж, туршдаг байсан. Германы инженерийн “Siemens” компаниар жишээ татан, компанийн мэдээллийг цуглуулах нь улс орны хүсэл сонирхолд хамаарах болохоос үндэсний аюулгүй байдалтай холбогдохгүй” гэдгийг онцолжээ.

1

Ийнхүү “NSA”-тай холбоотой дахин нэг таагүй мэдээлэл олонд ил болсноор Атлантын далайг дамнасан худалдааны наймааны итгэлцлийг сэргээхэд хүндрэл учирч магадгүй болжээ. Үүнээс өмнө “NSA” Германы канцлер Ангела Меркелийн гар утсыг чагнаж, танддаг гэх мэдээлэл дуулиан дэгдээж, хоёр орны харилцаанд сэв суулгасан юм. Харин АНУ-ын Ерөнхийлөгч Барак Обама өнгөрсөн долоо хоногт Германы “ZDF TV” телевизэд ярилцлага өгч, “Канцлерийн гар утсыг чагнаж, тандсан явдал нь алдаа байсан” гэсэн билээ.

1

Б.Дэлгэрцэцэг