Монгол Улсын Ерөнхийлөгч Ц.Элбэгдорж, УИХ-ын дарга З.Энхболд, Монгол Улсын Ерөнхий сайд Н.Алтанхуяг нар Монгол түмний ахмад настны төлөөлөл 10 буурайг хүндэтгэн золгосон юм. Төрийн ордноо уригдсан азай буурлуудаас хамгийн ахмад нь 1908 онд Архангай аймагт төрсөн, өдгөө 106 нас сүүдэр зооглож буй Гомбожавын Нанжидгуай байлаа. Тэгш 100 насны босго алхаж буй Сандагийн Сүрьяа гуай уригдсан азай буурлуудаас хамгийн ахмад эрэгтэй нь байв. Төрийн гурван өндөрлөг өндөр нас буян зооглосон азай буурлуудтай cap шинийн амар мэнд мэндэлцэж, идээ цагаагаар дайлж, гарын бэлэг гардуулаад Эзэн богд Чингис хааны хөшөө, Төрийн есөн хөлт Их цагаан тугны өмнө дурсгалын зураг татууллаа. Үүний дараа Ерөнхийлөгч, Улсын Их Хурлын дарга, Ерөнхий сайд нарМонголын ард түмэндээ мэндчилгээ дэвшүүлсэн юм. Монгол Улсын Ерөнхий сайд Н.Алтанхуяг “Улиран одож буй могой жил монголчууд бидэнд үр өгөөжөө өгч, бүтээн байгуулалт өрнүүлсэн сайхан жил байлаа. Гарч буй морьжилд хамтдаа “Монголдоо бүтээцгээе” гэж Шинэчлэлийн Засгийн газар уриалж байна. Бүтээж босгож байгаа бүхнээ дэмжиж, бие биедээ урам дэм хайрлаж, эх орондоо хамтдаа хөгжицгөөе” гэлээ. Алсарч буй “Тийн ялгуусан” хэмээх усан могойжилээ монгол түмэн сав дүүрэн олзтой үдэж, хурд хүчийг бэлгэдсэн“Ялгуусан” хэмээх модон морь жилээ бялхам амжилтаар эхлүүлж байгааг Төрийн өндөрлөгүүд бэлгэдэн хэлж, урин хавартай мэнд золгож буй энэ билэгт сайнөдөр ураг төрлөөрөө цуглан учирч, бэлгэтэй сайхныг зөгнөн ярилцаж, сар шинэдээ сайхан шинэлэхийг хотол түмэндээ ерөөлөө.   Төрийн золголтын дараа Монгол Улсын Соёлын гавьяат зүтгэлтэн ерөөлч, магтаалч Ц.Цэрэндорж төрийн хан хуурын хөг эгшгийг тааруулж,Төрийн ёслол, хүндэтгэлийн өргөөний жаврыг үргээн төр, түмэндээ өргөх магтаал хайлав. Хан хуурын эгшиг дор Эх орон тусгаар тогтнол, эрхэм төр , есөн цагаан туг, алтан соёмбот далбаа, эцэг тэнгэр, эх газар, эзэн Чингис хаанаа аялгуулан магтаж хайлсны дараа “Хамаг Монгол хагаан Чингисээ биширтүгэй. Өрхт Монгол өрнөн дэвжиж хөгжтүгэй. Эзэн түмэн эв эетэй амгалан байтугай. Эрэлхэг Монгол мөнх тэнгэрийн дор мандан бадартугай” хэмээн ерөөж гурвантаа уухайлахад Монгол Улсын Ерөнхийлөгч “Тэр ерөөл бат сайхан орших болтугай. Их баярлалаа” гэлээ. ый Үүний дараа Монголын бурхан шашинтны төв Гандантэгчинлэн хийдийн тэргүүн хамба, гавьж Д.Чойжамц, Дашчойлон хийдийн тэргүүн хамба Ч.Дамбажав нар Төрийн хүндэтгэлийн өргөө гэрт морилон ирж Монгол Улсын Ерөнхийлөгч, УИХ-ын дарга, Монгол Улсын Ерөнхий сайд нарт бараалхан золгож, морин жилийн өнгийг хэлэлцэв. Хамба нар ирж буй морин жилд монголчууд хийморь сүлд өөдөө, хөгжин бадрахын нигууртайг айлтгаж байв.