Монголын Хөрөнгийн биржийн захирал Х.Алтайг ажлаас нь чөлөөлөөд сар орчмын нүүр үзэж буй. Энэ хооронд түүний ажлыг Төрийн өмчийн хороо/ТӨХ/-ны Төрийн удирдлагын газрын дарга Д.Болормаа түр орлон гүйцэтгэж байгаа билээ. Тэгвэл ТӨХ-оос Хөрөнгийн биржийн гүйцэтгэх захирлыг сонгон шалгаруулахаар болжээ.

:

Энэхүү сонгон шалгаруулалтад оролцох нэр дэвшигчдэд биржийн үндсэн үйл ажиллагааны чиглэлээр болон санхүү, эдийн засаг, бизнесийн удирлага, магистраас доошгүй зэрэгтэй, мэргэжлээрээ 8-аас доошгүй жил ажилласан, үүнээс 4-өөс доошгүй жил нь хөрөнгийн зах зээлд мэргэжлийн үйл ажиллагаа эрхэлдэг хуулийн этгээдэд эрх бүхий албан тушаал хашсан байх зэрэг шаардлагуудыг тавьжээ. Мөн Монголын хөрөнгийн бирж ТӨХК-ийн зорилтот түвшинг ханган биелүүлэх, үйл ажиллагааг нь цааш хөгжүүлэх хөтөлбөрөө боловсруулсан, түүнийгээ хамгаалан, биелүүлж чадаагүйн төлөө хариуцлага хүлээхэд бэлэн гэдгээ бичгээр илэрхийлсэн байх, зээл, батлан даалт, баталгааны гэрээгээр хүлээсэн хугацаа хэтэрсэн аливаа өргүй байх, тодорхой албан тушаал эрхлэх буюу тодорхой үйл ажиллагаа явуулах эрхийг нь шүүхийн шийдвэрээр хассан эрүүгийн гэмт хэрэгт ял холбогдож шийтгүүлж байгаагүй байх, англи хэлний ярианы болон бичгийн гүнзгий мэдлэгтэй, компьютерийн өргөн хэрэглээний программ дээр чөлөөтэй ажилладаг байх шаардлагатай аж. Нэр дэвшигчдийн сонгон шалгаруулалтад орох материалыг 30 хоногийн хугацаанд буюу ирэх сарын 4-ний өдрийн 17.00 цаг хүртэл ТӨХ-ны байранд хүлээн авах юм байна.

:

А.Жаргал