Хойд Солонгосын удирдагч Ким Чен Ун Ардын дээд хуралд нэр дэвшсэн тухай “Yonhapnews.co.kr” агентлаг мэдээллээ. Тус агентлагийн мэдээлж буйгаар Хойд Солонгосын Ардын дээд хурлын XIII чуулганаар Ким Чен Уныг 100 хувийн саналаар депутатад нэр дэвшүүлж, мандатыг нь гардуулан өгсөн байна.  Ким Чен Ун тус сонгуульд ялалт байгуулсанаар, Хойд Солонгос дахь эрх мэдлээ бататгах боломжтой хэмээн АНУ, Өмнөд Солонгосын талууд үзжээ.

Хойд Солонгосын парламент 687 суудалтай, сонгууль нэг мандаттай тойргоор явагддаг. Ардын дээд хуралд сонгогдсон депутат таван жилийн хугацаанд ажилладаг. Хамгийн сүүлийн сонгууль 2009 оны гуравдугаар сард болсон юм. Албан ёсны мэдээллээр бол тухайн үед сонгуулийн ирц 99.98 хувьтай явагджээ. Сонгуулийн санал хураалаар 85 настай Ким Ен Нам 1998 оноос хойш тасралтгүй Ардын дээд хурлын даргаар сонгогдсон юм.

Залуу удирдагч энэ он гарсанаар 70-дээш насны хүмүүсийг халж, залуу боловсон хүчнээр сольж байгаа юм. Олон улсын ажиглагчид “Ким Чен Ун олон жилийн турш нэг суудалдаа сууж, дархан эрхтэй болсон Ким Ен Намыг улс төрөөс холдуулах нэг зальжин арга” хэмээн тайлбарлажээ.

Б.Дэлгэрцэцэг