Сар бүрийн эхний долоо хоногт Ерөнхий сайд Н.Алтанхуяг 21 аймгийн удирдлагуудтай хийдэг ээлжит цахим хурал өнөөдөр боллоо. Хурлын эхэнд Ерөнхий сайд нэгдүгээр сарын ажлаа дүгнэж, хоёр, гуравдугаар сард хийхээр төлөвлөсөн ажлуудаа тоймлон танилцуулсан. Мөн энэ онд “Монголдоо бүтээцгээе” зорилтын хүрээнд хийх гол ажлуудын талаар мэдээлэл өгөв.

x

2014 онд Дорнод, Сүхбаатар, Өмнөговь, Хөвсгөл, Говь-Алтай, Завхан аймгийн төвийг Улаанбаатар хоттой хатуу хучилттай автозамаар холбоно. Экспортыг нэмэгдүүлж, импортыг орлох үйлдвэржилтийн 1151 төсөл хүлээж аваад эхний сонгон шалгаруулалтыг хийж байна. Түүнчлэн 21 аймгийн 9 нь дулааны станцгүй байгаа аж. Эдгээр аймагт дулааны станц барих асуудал Засгийн газрын түвшинд яригдаж байгаа ба нийт найман аймгийн дулааны станцын ажилд хоёроос гурван тэрбум төгрөгийг улсын төсвөөс гаргаж, үлдсэнийг нь хувийн хэвшилтэй хамтран ажиллах саналыг гаргасан бөгөөд хоёрдугаар сард эхлүүлэх бэлтгэлийг хангасан байна.

sa

2013 оны төсвөөс Ерөнхий сайдын багцад 50 тэрбум төгрөг суулгасны 25 тэрбум төгрөгөөр аймгуудын оношлогооны төвүүдэд тоног төхөөрөмжийн шинэчлэл хийсэн байна. Гэвч орон нутгийн удирдлагууд оношлогооны төвийн барилгуудын завсараа хийж дуусаагүй учраас тоног төхөөрөмж нь хүлээгдээд байгааг Ерөнхий сайд шүүмжилсэн. Орчин үеийн шинэ тоног төхөөрөмж нь бэлэн байхад эмнэлгийн барилгууд нь бэлэн бус байгаа нь орон нутгийн удирдлагуудын хариуцлагагүй байдал нөлөөлж байна. Хэрэв засвараа хугацаанд нь дуусгахгүй бол өөр оношлогооны төв шаардлагатай засвар нь бэлэн болсон аймгуудад өгнө гэдгийг сануулсан юм.  Мөн “Шинэ сумын төв” төслийн хүрээнд аймаг бүрт нэг сумын төвийг загвар болгож хөгжүүлнэ. Төсөл хэрэгжүүлэх сумаа сонгож саналаа ирүүлсний дагуу Засгийн газрын хуралдаанаар эцэслэн шийдвэрлэнэ гэлээ.

ad Түүнчлэн энэ хоёрдугаар сарын 10-аас мэргэжилтэй ажилтан бэлтгэх сургалт орон даяар эхлэх учраас аймгийн удирдлагууд бүртгүүлсэн хүмүүсийн мэдээллийг нягталж, сургалт эхлэх бэлтгэлийг хангах үүрэг өглөө. 190 орчим мянган төгрөгийн цалинтай, мэргэжилтэй ажилтан энэ жил 7000-ыг бэлтгэхээр төлөвлөжээ. Мэргэжилтэй ажилтан бэлтгэх сургалтад хамрагдах хүмүүс орон нутгийн удирдлагууддаа хандан бүртгүүлэх юм байна.

da Ховд, Баян-Өлгий, Увс зэрэг аймгуудад битүү захыг барих  үүрэг өгсний дагуу энэ хоёрдугаар сард ашиглалтад орно гэдгийг аймгийн удирдлагууд нь хэлж байв. Мөн төрийн зарим барилгуудыг хүүхдийн сургууль, цэцэрлэг болгох ажлыг зарим аймагт эхлүүлээд байгаа аж. Тухайлбал, Архангай аймагт Үйлдвэр хөдөө аж ахуй яамны харьяа барилгыг хүүхдийн цэцэрлэг болгох санал гаргасан ч яамдынх нь удирдлагуудтай зөвшилцөж чадахгүй байгаагаа Ерөнхий сайдад уламжилсан юм.

s

П.Наран