"Ерөнхий сайдын 30 минут" уулзалтаар өнөөдөр  “Буянт-Ухаа I” хорооллын 1764 айлын орон сууцанд иргэдийг хэрхэн оруулах талааар мэдээлэл өглөө. Нэг жил гаруйн хугацаанд баригдаж, эхнээсээ ашиглалтад ороод байгаа тус хорооллын орон сууцанд орох хүсэлтэй иргэдийн захиалга авах журмыг ирэх долоо хоногт эцэслэн батлах юм байна.

:

Тус орон сууцнуудын нэг метр квадратын үнэ нь 1.280.000 төгрөг буюу зах зээлийн үнээс хямд  байх тул Засгийн газраас зорилтот бүлгийнхэнийг энэхүү орон сууцанд оруулахаар болсон. 1764 айлын 60 хувь нь төрийн албан хаагчдаас, 40 хувь нь залуу гэр бүл, ахмад настан, хөгжлийн бэрхшээлтэй иргэдийг оруулах квот тогтоосон. Орон сууцны үнийг хамгийн багаар, бодитоор тогтооно хэмээн ажлаа эхлүүлсэн тус хорооллын орон сууцнууд нь 1-3 өрөө бүхий 32-68 метр квадрат хүртэлх хэмжээтэй. Уг хорооллоос авсан орон сууцыг худалдахгүй гэдгийг Ерөнхий сайд онцолсон.

.

Тиймээс байр худалдан авч үнэ хүргэж зардаг, олон байр худалдан аваад хөлслүүлдэг ченжүүдийн гараар оруулахгүйн тулд байр худалдан авахыг хүсэгчдэд онцгой шаардлага тавьжээ. Тодруулбал, авсан байраа 15 жилийн хугацаанд бусдад зарахгүй, ашиг олох зорилгоор түрээслэх эрхгүй хэмээн гэрээлэх бөгөөд анх удаа орон сууц худалдан авч байгаа болон 8 хувийн хүүтэй зээлээр урьдчилгаа 30 хувийг төлөх зэрэг шаардлага тавих юм байна. Гэхдээ анх удаа байр худалдан авч байгаа гэдэгт өмнө нь ээж, аавынхаа байранд нэр бүртгэлтэй байх нь хамаагүй гэнэ. Гол нь тухайн иргэн өөрийн нэрээр ямар нэгэн байр худалдан авсан болон эзэмшиж байгаагүй гэдгийг Үл хөдлөх хөрөнгийн бүртгэлийн газраас лавлагаа авсан байхад болох аж.

.

П.Наран