Дагестаны бүсэд ажиллагаа явуулж буй Оросын аюулгүйн хүчнийхэн Волгоградын халдлагыг зохион байгуулсан хэмээн сэжиглэгдэж байсан этгээдийг гэртээ бүгэж байхад нь илрүүлэн, хороожээ. Халдлага үйлдсэн 30 настай Жамалдин Мирзаев болон хамт байсан хүн нь аюулгүйн албаныхан руу гал нээсэн учир буудан хороохоос аргагүйд хүрсэн хэмээн албаны эх сурвалж мэдээлжээ. Харин гэрт байсан өөр гурав хүн бууж өгсөн байна.

Өнгөрсөн арванхоёрдугаар сарын сүүлчээр хоёр этгээд Волгоград хотод дараалан халдлага үйлдэж 34 хүний аминд хүрсэн билээ. Халдлага үйлдэгчид Дагестаны нэгэн лалын зэвсэгт бүлгийн гишүүд байсныг өнгөрсөн долоо хоногт тогтоосон юм. Дагестаны зэвсэгт бүлэглэлийнхний зүгээс Өвлийн олимпийн наадмын үеэр Ерөнхийлөгч Путинд “бэлэг барина” хэмээн хэд хэдэн удаа сүрдүүлж байсан юм.

Б.Дэлгэрцэцэг