Шинэчлэлийн Засгийн газар хоёрдугаар сараас тэтгэвэр тэтгэмжийг 15-30 хувиар нэмэгдүүлснээ зарласан. Харин тэтгэвэр, тэтгэмжийн нэмэгдэлд ахмадууд сэтгэл гонсгор байна. Тиймээс ч  Ахмадын холбооноос Монгол Улсын Ерөнхийлөгч,  УИХ-ын дарга, Ерөнхий сайд нарт хандан мэдэгдэл  гаргажээ.   Уг мэдэгдэлд “Өндрийн Засгийн газар ард түмнийхээ татварын орлого, Чингис, Самурай бонд, гадаад орнуудын хандив тусламжаар орж ирсэн урьд өмнө дуулдаагүй их мөнгөн дээр туйлж байгаа боловч ард түмний  амьдрал өдрөөс өдөрт доройтож, олонхи нь ядуурлын туйлд хүрээд байна.  Сонгуулийн амлалт ёсоор үнэ тарифийн өсөлттэй уялдуулан иргэдийнхээ цалин, тэтгэврийг нэмэх учиртай. Гэтэл бүх зүйлийн үнэ, үйлчилгээний тариф өдрөөс өдөрт өссөөр 30-40 хувь нэмэгдчихээд байхад цалин, тэтгэвэр огтхон ч нэмэгдсэнгүй. 2013 оны сүүлчээс эхлэн цалин, тэтгэврийг “нууц”-аар нэмэх сураг гарч, олон дахин хойшилсны эцэст 2014 оны 2 дугаар сард тэтгэврийг нэмсэн дүр үзүүллээ.

Тэтгэврийг 15-30 хувь нэмж байгаа хэмээн хэвлэл мэдээллийн хэрэгслээр байнга сурталчилж байгаа боловч, тэтгэврийн дэвтэрт бичигдсэн тоо өдөр, шөнө шиг зөрүүтэй байна.  Тухайлбал, тэтгэврийн доод хэмжээ буюу 180.3 мянган  төгрөгийн тэтгэвэр 207.3 мянга болж 15.0 хувиар, хувь тэнцүүлсэн тэтгэврийн доод хэмжээ буюу 145.2 мянган төгрөгийн тэтгэвэр 172.2 мянга болж 18.6 хувиар нэмэгдсэн нь хамгийн өндөр нэмэгдэл болж байна. Харин 201-600 мянган төгрөгийн тэтгэвэр дээр 22.0 мянган төгрөг нэмснээр 3.7-11.0 хувийн, 601-800 мянган төгрөгийн тэтгэвэр дээр 20.0 мянган төгрөг нэмсэн нь дунджаар ердөө 2 хувийн нэмэгдэл болж байгаа юм. Харин нийгмийн халамжийн тэтгэвэр 103,6 мянган төгрөг байсныг ердөө 11,4 мянган төгрөгөөр нэмэгдүүлж 115,0 мянган төгрөг болгосон байна. Ингэж, үл ялих төдий тэтгэвэр нэмсэн хирнээ Хүн амын хөгжил, нийгмийн хамгааллын сайд С.Эрдэнэ тэтгэврийг 15-30 хувиар, түүний дотор халамжийн тэтгэврийг 66.2 хувиар нэмсэн мэтээр телевизээр мэдээлсэн нь бодит байдалд нийцэхгүйгээр барахгүй ахмад буурлуудаа доромжилж байгаа явдал юм. Иймээс эрх баригч Та бүхэнд холбогдох арга хэмжээг авч хэрэгжүүлэхийг шаардаж дараахь мэдэгдлийг гаргаж байна.

Үүнд:

1/УИХ-аас баталж өгсөн 230 гаруй тэрбум төгрөг, тэр дундаа ахмад настан, хөгжлийн бэрхшээлтэй иргэдийн тэтгэвэр тэтгэмжид зориулагдах ёстой мөнгөний зарцуулалтыг ажлын хэсэг гаргуулан шалгаж, ард түмэндээ мэдээлэх:

  2/C.Эрдэнэ сайдын мэдээлсэн, 60 гаруй хувиар тэтгэвэрээ нэмүүлсэн аль намын, ямар ажил алба хашиж байсан, албан ёсоор хичнээн төгрөгийн тэтгэвэр тогтоолгосон хүмүүс байгаа талаарх судалгааг гарган нийтэд мэдээлэх, хэрэв ташаа мэдээлэл хийж, олон нийтийг төөрөгдүүлсэн бол Хүн амын хөгжил, нийгмийн хамгааллын сайд  С.Эрдэнэд улс төрийн хариуцлагх тооцох;

3/ цалин, тэтгэврийг нэмэгдүүлэхтэй холбогдуулан Улсын Их Хурал дахь Монгол Ардын Намын бүлгээс тавьсан шаардлага, өргөн мэдүүлсэн хуулийн төслүүдийг Улсын Их Хурлын чуулганы хуралдаанаар яаралтай хэлэлцүүлэх;

4/ Чингис бондын 1.5 тэрбум ам.долларыг жил гаруйн хүүгийн хамт, Самурай бонд болон дундаас нь сох дутчихсан гээд байгаа 60 сая ам.долларын хуваарилалт, зарцуулалтыг хууль хяналтын байгууллагаар шалгуулан дүнг олон нийтэд ил тод мэдээлэх.

Энэхүү мэдэгдлийн хариуг 2014 оны гуравдугаар сарын 10-ны дотор албан ёсоор болон хэвлэл мэдээллийн хэрэгслээр дамжуулан өгөхийг шаардаж байна” гэжээ.

УИХ дахь МАН-ын бүлгийн гишүүд дээрх мэдэгдэлтэй холбогдуулан Ахмадын холбооны төлөөлөгчдийг хүлээн авч уулзаж саналыг нь сонссон юм. Ахмадууд МАН-ын бүлгийн гишүүдийг энэ асуудлааг УИХ-д хандаж өгөхийг хүсч байлаа. Хэрвээ тэдний мэдэгдлийн хариуг заасан хугацаанд өгөхгүй бол жагсахаа мөн мэдэгдсэн юм.

5

Н.Энх