Өнгөрөгч амралтын өдрүүдэд Цагдаагийн байгуулагад 163 гэмт хэргийн шинжтэй үйлдэл бүртгэгдснийг холбогдох нэгжүүд шалгаж байна. Гэмт хэргийн шинжтэй эдгээр үйлдлийн 125-д нь цагдаагийн байгууллага цаг тухай бүрт нь эзэн холбогдогчийг олж тогтоосон ба хэрэг бүртгэл мөрдөн байцаалтын  ажиллагаанд явагдаж байна. Харин бусад хэрэг буюу иргэд цагдаагийн байгуулагад хугацаа хожимдож өгсөн, өргөдлөөр мэдэгдсэн мэдээллүүдийн хэрэг бүртгэл мөрдөн байцаалтын ажиллагаа хийгдээд явж байгаа аж.

“Амралтын өдрүүдэд гарсан гэмт хэргүүдийн хувьд хулгай, танхайн гэмт хэргийн гаралт буурахгүй байх нь ажиглагдаж байгаа болохоор иргэд өөрийн эд хөрөнгөдөө тавих хараа хяналтаа сайжруулах хэрэгтэй байгаа юм. Мөн танхайрах гэмт хэргээс урьдчилан сэргийлэхийн тулд архи согтууруулах ундааны зүйлийг зүй зохистой хэрэглэх, болж өгвөл хэрэглэхгүй байх шаардлагатай байна” гэж ЦЕГ-ын хэвлэл мэдээллийн төвийн ахлах байцаагч, цагдаагийн ахмад Ё.Лхагвасүрэн ярьсан.

Мөн тээврийн хэрэгслийн хөдөлгөөний аюулгүй байдлын журам зөрчих гэмт хэрэг энэ амралтын өдрүүдэд нэлээдгүй бүртгэгджээ. Нийт 50 гаруй гэмт хэрэг бүртгэгдснийг Замын цагдаагийн алба хаагчид шалгаж байгаа аж. Согтууруулах ундааны зүйл хэрэглэсэн үедээ тээврийн хэрэгсэл жолоодож яваад авто осол хийсэн, холбогдсон тохиолдол байгаа учраас архи согтууруулах ундаа хэрэглэсэн үедээ тээврийн хэрэгсэл барихгүй байхыг Цагдаагийн байгууллагаас анхаарууллаа.

Б.Буд