Өнөөдөр АН-ын сэтгүүлчидтэй уулздаг "4-11" уулзалт боллоо. Энэ үеэр тус намын ерөнхий нарийн бичгийн дарга Ц.Оюундариас намын үйл ажиллагаатай холбоотой асуудлыг тодруулсанаа хүргэж байна.

.

-Ардчилсан намын Үндэсний зөвлөлдөх хорооны уулзалт тавдугаар сард болно гэж байсан ч намын зүгээс тодорхой мэдээлэл гарахгүй байна. АН-ын дотоод зөрчлөөс болж ҮЗХ-гоо хуралдуулахгүй байгаа гэсэн мэдээлэл ч байна. ҮЗХ-ны хурлын тов гарсан уу?

-Манай намын дүрмээр ҮЗХ-ны хурал жилд хоёр удаа хуралддаг. Хурлын товыг намын дарга эсвэл ҮЗХ-ны гишүүдийн 3/1-ийн санаачилгаар хийдэг. Улс төрийн намуудын хууль батлагдах гэж буйтай холбоотойгоор хуулийн төслийг бүх аймаг, дүүргийн намын дарга нарт танилцуулсан байгаа. Гүйцэтгэх зөвлөлийн хуралд ч мөн ялгаагүй энэ хуулийн төслийн талаар дэлгэрэнгүй танилцуулгыг хийсэн байгаа. Үүнтэй холбоотойгоор гүйцэтгэх зөвлөлөөс ойрын хугацаанд ҮЗХ-г хуралдуулах шаардлага байхгүй гэж үзэж байгаа. Гүйцэтгэх зөвлөлийн хурлаар ҮЗХ-ны гишүүдийн 3/1 нь санаачилга гаргаад хуралдах шаардлагатай гэж үзвэл тогтоолоо гаргаад хуралдуулах боломжтой.

.

- Дархан уул аймаг, Хан-Уул дүүргийн АН-ынхан хоорондоо хэрүүл маргаантай байгаа. Хоёр тамгатай байх жишээтэй. Энэ маргааныг хэрхэн шийдвэрлэх вэ?

-Манай нам хэвтээ тогтолцоотой. Тухайн аймгийн намын хороо хуралдаад даргаа сонгодог. Түүнээс биш намын дарга аймаг, дүүргийн намын дарга нарыг батламжилдаггүй. Тэгэхээр тухайн орон нутгийнхан намын хорооныхоо хүрээнд асуудлаа шийдэх ёстой.

.

-Дээрх асуудал дээр намын хяналтын хороо буруу шийдвэр гаргаж, нэг талд ажилласан гэдэг яриа гарсан. Энэ асуудалд ямар тайлбар өгөх вэ?

-Манай намын хяналтын хороо бие даасан байгууллага. Намын хэрэг эрхлэх газартай огт хамаагүй. Энэ бол намын их хурлаар байгуулагддаг дарга ч нөлөөлж чадахгүй бие даасан байгууллага. Энэ байгууллагад тухайн намын хороо маргаантай асуудлаа шууд тавьж болно. Тэгээд Хяналтын ерөнхий хороо нэгдсэн хуралдаанаар шийдвэр гаргадаг. Хяналтын ерөнхий хорооны дарга ганцаараа шийдвэр гаргадаггүй.

.

П.Наран