Нийслэлийн Засаг дарга бөгөөд Улаанбаатар хотын захирагч Э.Бат-Үүл сэтгүүлчидтэй зангиагүй уулзалт хийлээ. Хоёр дахь удаагаа товлогдсон энэхүү уулзалтаар гэр хорооллын дахин төлөвлөлтийн ажлын явцын талаар мэдээлэл өгч, сэтгүүлчдийн асуултад хариулсан юм. Тэрбээр уулзалтын эхэнд гэр хорооллын дахин төлөвлөлтийг санаанд багтамгүй богино хугацаанд аварга амжилт үзүүлсэн ажил хэмээн тодорхойлсон. Солонгос, Япон зэрэг дахин төлөвлөлт хийсэн газруудад энэ ажлын зөвхөн яриа хэлэлцээр нь хоёроос дээш жил өрнөдөг. Гэтэл Улаанбаатар хотод өрнөж буй дахин төлөвлөлт нэг жилийн хугацаанд иргэдтэй тохирч, бүтээн байгуулалтын ажил эхэлсэн нь дэлхийн рекорд тогтоох хэмжээний амжилт болсон хэмээн мэдэгдэв. Нэг жилийн хугацаанд 4000 айлтай ярилцаж тохирсон, энэ онд 11 мянга орчим айлын орон сууц ашиглалтад орно гэх мэтээр хотын даргад бахархах зүйл цөөнгүй байгаа бололтой.

5

Э.Бат-Үүл даргын нэрийн хуудас болсон энэ ажлыг газар дээр буулгах саналаа 50 гаруй аж ахуйн нэгж, байгууллага ирүүлжээ. Үүнээс шигшигдсэн 16 байгууллага 67 талбар дээр ажлаа эхлээд байгаа аж. Тухайлбал, Сонгинохайрхан дүүргийн 5, 6, 7 дугаар хороонд бүтээн байгуулалт өрнүүлэх эрх авсан Хера Пропертийз ХХК гэхэд нийт 70.4 га газарт дахин төлөвлөлт хийнэ. Одоогоор 9 айлын газрыг чөлөөлөөд байгаа бөгөөд 189 айлын орон сууцыг 2015 оны нэгдүгээр улиралд ашиглалтад оруулах аж. Гэр хорооллын дахин төлөвлөлтийн ажил нь иргэдэд ая тухтай орчинд амьдрах боломжийг бий болгож байгаа ч нөгөө талаараа төслийг хэрэгжүүлж байгаа аж ахуйн нэгж, байгууллагуудад асар их ашиг авчрах ажил. Дөрвөн айлын газар дээр л 120 айлын орон сууц баригдана гэдгээс үүнийг хялбархан харж болно. Дээр нь дэд бүтцийнх нь зардалд зориулан хотын төсвөөс 53 тэрбум төгрөг гаргаж өгсөн гэнэ. Хамгийн чухал нь иргэдийн ихэнх нь найртайгаар хүлээж аван, түрүүч нь газраа чөлөөлөөд өгчихсөн. Тэгэхээр одоо гүйцэтгэгч байгууллагуудын хүн чанарт л найдах үлдэж байна. Иргэдийн өмчин дээр чанартай барилга барьж, хугацаандаа хүлээлгэн өгсний дараа гэр хорооллын дахин төлөвлөлтийн ажлын үр дүнг хэлэлцэх учиртай. Өнөөдөр ч төлөвлөлтөд орж буй иргэдэд айдас бий. Ая тухтай, цэвэр орчинд амьдрах хүсэл нь орох орон гэргүй болгочих вий гэсэн айдас байгааг орхидуулж болохгүй. Дээр нь өөрийн гэсэн орчныг бүрдүүлж, өр зээл тавьж барьсан байшингийнх нь оронд эдэлгээ даахгүй, чанаргүй барилга баригдахгүй гэсэн баталгаа ч тэдэнд чухал. Хяналтыг иргэд тавина гэж байгаа ч үнэн хэрэгтээ хотын захиргаа үүнд илүү сэтгэл гаргах шаардлагатай. Жилийн дараа Бат-Үүлийн хийсэн ажлын царай энэ гэж зүхүүлэхгүйн тулд ширхэг тоосгонд ч анхаарал хандуулах нь зүйн хэрэг.

5

Хотын даргын багийн мөрийн хөтөлбөрийн хамгийн том зорилго болсон гэр хорооллын дахин төлөвлөлтийн ажилд дүн тавих болоогүй байна. Өнгөрсөн нэг жилийн хугацаанд төслийн хүрээнд хийгдсэн ажлуудыг үгүйсгэж болохгүй ч дөнгөж эхэлж буй ажилд санаанд багтамгүй өндөр амжилт гэсэн дүн тавих нь хэтэрхий эртэдсэн асуудал. Хүний хашаанд толгой хоргодож байгаа айл өрхийг яах вэ, одоо ч зөрүүдэлсээр байгаа газрын эздийг хэрхэх, түр оршин суух орон байрыг яаж зохицуулах вэ гээд шийдлээ хүлээсэн олон асуулт бий. Хамгийн чухал зүйл болох байрны чанар, хугацаандаа ашиглалтад орох эсэх гэх мэтээр дэлхийн дээд амжилт гэж хөөрцөглөхөөс өмнө шийдэх олон асуудал Үүл даргыг хүлээж байна.

6

В.Хэрлэн